Гар, нүүрийн саван, алчуур, шүдний оо, сойз, ариун цэврийн хэрэглэл, дотуур хувцас зэрэг 19 нэр төрлийн зүйлээс бүрдсэн бэлгийн багцыг өвөлжилт хүндэрсэн аймгийн малчдад хүргүүлэхээр боллоо.

Нийт 24.3 сая төгрөгийн үнэ бүхий 120 ширхэг бэлгийг багцыг ОБЕГ- ын дэд дарга, хурандаа Г.Ариунбуянд НҮБ-ын Хүн амын сангийн ажилтнууд өчигдөр хүлээлгэн өгсөн юм. Тус сангийн суурин төлөөлөгч Наоми Китахара “Байгалийн гамшиг буюу зуд нүүрлээд байгаа энэ нөхцөлд эмэгтэйчүүд өсвөр насны охидын өвөрмөц хэрэгцээг хангахад онцгой анхаарах шаардлагатай. Тиймээс НҮБ-ын Хүн амын сангаас охид эмэгтэйчүүдийн наад захын хэрэгцээ болсон ариун цэвэр, эрүүл ахуйн багцуудыг бэлтгэлээ. Үүнд өөрсдийгөө хамгаалахад тус болох шүгэл, гар чийдэн зэргийг багтаасан” гэв.

Одоогийн байдлаар 20 аймгийн 90 сум цагаан зудтай байгаа аж. Эдгээр бараа, бүтээгдэхүүнийг өвөлжилт хамгийн их хүндэрсэн Ховд Увс, Завхан, Сэлэнгэ, Дундговь, Баянхонгор гэсэн зургаан аймагт энэ долоо хоногтоо багтаан хүргүүлэх юм байна. Цас ихтэй, зудтай байгаа аймгуудад манай орны нийт малчин өрхийн 40 гаруй хувь буюу 62 мянган айл өвөлжиж буй аж.

Эдгээр малчин өрхөд жирэмсэн эх 3300, 0-5 насны 28 мянга гаруй хүүхэд торниж байгааг ОБЕГ-ын дэд дарга, хурандаа Г.Ариунбуян онцолсон. Тэрбээр мөн эдгээр өрхийн 5000 гаруй нь нэн ядуу амьдралтайг дуулгав. Тиймээс ариун цэвэр, эрүүл ахуйн багцуудыг олон хүүхэдтэй, жирэмсэн эхчүүдтэй өрхөд хүргэх гэнэ. Дашрамд дуулгахад, 2010 оны зудад долоон сая мал хорогдсон аж.