Энэ УИХ бүрдээд удаагүй байхад гишүүн Г Баярсайхан, У.Хүрэлсүх нар чуулганы танхимд маргалдаж, нэг хэсэг ярих сэдэв болсныг уншигчид мартаагүй. Цөс ихтэй У.Хүрэлсүх гишүүн нөгөөхийгөө чуулганы танхимын үүдэнд шанаадаж унагасан явдал болсон юм л даа.

Манай УИХ-ын түшээд хэл амаараа нэгнийгээ хангалттай доромжилж, хэрэлддэг. Харин нэгнийхээ биед халдаж байсан нь ховор учраас олон нийт ийнхүү анхаарсан хэрэг.

Үүнээс удалгүй У.Хүрэлсүх эхнэрээ эмчлүүлэх шаардлагатай гэсэн шалтгаанаар УИХ-ын гишүүнээсээ татгалзаж, энэ хоёр эрхэм нэгнээ “хялайхгүй" болж холдсон юм.

Тэгвэл өнгөрсөн Цагаан сарын баяраар тэд уулзаж, нударга биш хөөрөг зөрүүлэн золгожээ. Эдүгээ Хөдөлмөрийн сайд болсон Г.Баярсайхан гишүүн У.Хүрэлсүхтэй тамхилж буй зургаа оруулаад "Эр улс өс саналгүй явах сайхан" хэмээн жиргэсэн байна лээ.

Улс төрд удаан тэсье гэвэл чуулган, Байнгын хорооны танхимд маргаснаа хаалгаар нь гараад л мартаж чаддаг байх чадварт суралцах ёстой биз ээ.