УИХ-ын гишүүн Л.Болд сүүлийн хоёр ч парламентын бүрэн эрхийн хугацаанд тусгаар тогтнолын яамд гэгддэг Батлан хамгаалах болон Гадаад харилцааны яамыг удирдсан бодлоготой, болгоомжтой улстөрчдийн нэг.

Дотоодын улс төрийн хэрүүлд төдийлөн татагдан ордоггүй, хэл үгнээсээ болж ороогдоод байдаггүй “чимээ багатай” энэ улстөрч хурдан явахыг биш хол явахыг илүүд үздэг гэж харагддаг.
Тэр тэсрэмтгий хүн. Тэгэхдээ үргэлж тэсэрч, өөрийгөө шатааж явдаггүй. Хаалттай нийгмийг сөрж, иргэддээ эрх чөлөөг авчирсан ардчилсан хувьсгалаар тэр нэг “тэсэрсэн” юм.
Тэр үед Монголын оюутны холбоог удирдан хувьсгалд оролцож, ардчиллын загварыг зуралцсан. Нийгмийг хэн нэгэн биш, хэсэг бүлэг ч биш бид бүгдээрээ бүтээж, эрэг шураг нь болж оролцдог. Энэ утгаараа өнөөгийн ардчилсан нийгэм бидний хамтын бүтээл. Халтирч бүдэрсэн, онож боссон... бүхэн маань биднээс бүгдээс маань хамаарсан ч бас биднээс үл хамаарсан. Тийм л учраас өнөөдрийн бүтээж яваа нийгэмдээ нэг хэсэг нь сэтгэл дүүрэн, нөгөө хэсэг нь санаа дундуур яваа. Ардчилал анхны загвар-зургаасаа юугаар яаж гажуудсаныг хэлэх, залруулах үүрэг бид бүгдийнх. Тэр дундаа ардчилсан хувьсгалын удирдагчдад арай илүүтэй оногдох учиртай биз. Тийм учраас тэр дахиад тэсрэв үү?!
Унаган ардчиллаа арчлан тордох, улстөрчдийн гажуудлаас сэргийлэх зорилгоор Л.Болд МоАН Санаачилга хэмээх олон нийтийн байгууллагыг санаачилсан гэх.
МоАН Санаачилга бол улс төр дэх амбици биш унаган ардчиллаа хамгаалах ухамсар, үүрэг, үйл ажиллагаа гэж тэр тодорхойлж буй.

Л.Болдын удаах тэсрэлт