УИХ-ын гишүүн, БХБ-ын сайд З.Баянсэлэнгэ салбарынхаа зарим ажлын явц байдлыг газар дээр нь үзэж, танилцлаа.

Тэрбээр “Дэд бүтэц” төслийн хүрээнд хийгдсэн Хан-Уул дүүрэг дэх цэвэр усны эх үүсвэрийн байгууламжийг шалгалаа. Энэ төслийн хүрээнд оршин суугчдыг цэвэр усны эх үүсвэрээр хангах зорилготой 22 гүний худаг бүхий байгууламжийг барьж байгуулжээ. Баригдаад хоёр жил болж, хэрэглэгчдийг цэвэр усаар хангаж байгаа энэ байгууламж харъяалагдах “эзэн”-гүй, улсын хамгаалалтад бүхий онцгой объект тул цагдаагийнхны хамгаалалтад байгаа аж. Энэ асуудлыг яаралтай шийдвэрлэхээ БХБ-ын сайд З.Баянсэлэнгэ онцолж байлаа. Түүнээс энэ талаар тодруулахад:

-Буянт-Ухаа I, II хорооллын оршин суугчдын ундны цэвэр усны эх үүсвэрийг энэ 22 худгаас татаж байгаа. Цаашлаад 15 мянган өрх айлын ундны цэвэр усны болон бохирын асуудлыг шийдвэрлэх худгийг “Дэд бүтэц” төслийн хүрээнд барьж, хүлээлгэж өгсөн. Энэ худгууд ашиглалтад ороод 2 жил болсон хэдий ч өмчийн асуудал нь шийдэгдээгүй байна. Нэгэнтээ төсөл хэрэгжээд дууссан. Нийслэл үүнийг хүлээж аваагүйгээс болоод төсөл үр дүнгүй болох, зардал нь ихсэх, эргээд яамнаасаа санхүүжилт нэхдэг ойлгомжгүй асуудал тулгараад байгаа юм. Тиймээс НИТХ-ын дарга Д.Баттулгатай санал солилцсон. Өмчлөлийн асуудлыг шийдэж өгөх тал дээр удахгүй арга хэмжээ авна гэдгээ хэлсэн.

Энэ нь УСУГ дээр гардаг тулгамдсан асуудал юм билээ. Өмнө нь өчнөөн өр төлбөртэй объектуудыг хүлээж авснаас болоод УСУГ ихээхэн хэмжээний зардлын зөрүү, өр үүссэн байна. Өрийн асуудлаа шийдээгүй байхад дахиад өмчлөлийн асуудал босч учир хүлээж авахаас болгоомжилсон талтай гэлээ. Дараагаар нь тэрбээр Хан-Уул дүүрэгт шинээр баригдаж байгаа цэвэрлэх байгууламжийн барилгын ажлын явцтай танилцав.

Энэ цэвэрлэх байгууламж нь Хан-Уул дүүргийн оршин суугчид төдийгүй нийслэлчүүдийн хамааралтай. Өмнө цэвэрлэх байгууламжийн дараагаар Улаанбаатарт баригдаж буй хоёр дахь байгууламж. Жилийн өмнөөс барилгын ажил нь эхэлсэн энэ байгууламжийг уг нь энэ оны 8 дугаар сард ашиглалтад хүлээлгэж өгөх төлөвлөгөөтэй юм байна. Гэвч одоогийн байдлаар Хөгжлийн банкнаас орж ирэх санхүүжилт гацснаас ажил нь түр зогссон байгаа аж. Цэвэрлэх байгууламжийн барилгын явц 60 хувьдаа орсон, хэрвээ санхүүжилтийг шийдвэрлээд өгвөл төлөвлөсөн хугацаандаа ашиглалтад хүлээлгэн өгөх боломжтой хэмээн Ерөнхий инженер Б.Баттулга сайдад учирлаж байсан.

Өмнөх цэвэрлэх байгууламжийн лаг нь агаарт ууршдаг, ил задгай байсан. Харин энэ цэвэрлэх байгууламж ашиглалтад орсноор хоногт 20 мянган ам.метр бохир усыг 90 хувь хүртэл цэвэрлэх хүчин чадалтай. Бохир нь ил явагдахгүй, үнэр гаргахгүй гэдгийг мэргэжилтнүүд онцолж байлаа. БХБ-ын сайд З.Баянсэлэнгэ “Бид үндэсний хэмжээний дотоодын компаниудаа томоохон бүтээн байгуулалтын ажилд дэмжиж оролцуулах боломжоор хангасан. Энэ хүрээнд БХБЯ-наас 126 тэрбум төгрөгийн өртөг “Дэд бүтэц” төсөлд үндэсний 30 гаруй компанийг оролцуулан хэрэгжүүлж байна. Энэ хүрээнд цэвэрлэх байгууламж барих ажил хийгдэж байна.

Харамсалтай нь Хөгжлийн банкнаас тодорхой хэмжээний санхүүжилт хийгдээгүй, 2015 оны төсвийн тодотголоос хасагдсан байгаа. Тиймээс 2016 оны улсын төсөвт бид суутгаж өгсөн. Гэсэн хэдий ч 10 гаруй тэрбум төгрөгийн асуудал өнөөдөр тулгамдсанаас энэ том бүтээн байгуулалтын ажил зогсох нь. Компаниуд боломжийн хэрээр бие биенээ нөхөөд ажиллаж байна. Санхүүгээс болоод ажил саатаад байгаа нь олон аж ахуйн нэгжүүдэд тулгамдсан асуудал. Бид нэгэнт эхлүүлсэн ажлаа анхаарал хандуулж, шийдвэрлэх ёстой. Үүний төлөө шийдвэр гаргах хүмүүс ажиллаж ёстой гэсэн байр суурьтай байна. Тийм учраас санхүүгийн эх үүсвэрийг шийдвэрлэх хүрээнд Сангийн яамтай ярилцаад 3.2 тэрбум төгрөгийг суулгаад байна. Үлдэгдэл санхүүлжилтийг даруйхан шийдвэрлэхийн төлөө ажиллана гэж байдлыг газар нь нь явж үзсэний хувьд хэлмээр байна” хэмээлээ.

Цэвэрлэх байгууламжийн барилгын санхүүжилтийг шийдвэрлэнэ