Улс төрийн намын жагсаалтаар сонгогдох пропорционал элементийг Үндсэн хууль зөрчсөн гэж АН, МАН-ынхан үзсэнээр жагсаалтыг үгүй болгохоор зүтгэж байгаа билээ.

Харин МАХН-ынхан эсрэг саналтай байгаа бөгөөд өнгөрсөн мягмар гарагт дээрх асуудлаар завсарлага авсан юм. 

Сонгуулийн хуулийн дээрх өөрчлөлттэй зэрэгцээд хуульд заасан эмэгтэйчүүдийн квотыг УИХ дахь эрэгтэй гишүүд багасгах, магадгүй бүүр байхгүй болгох тухай асуудал яригдаж байна. Энэ талаар УИХ дахь эмэгтэйчүүдийн бүлгийн дарга Л.Эрдэнэчимэгээс тодруулга авлаа. 

Тэрбээр “Эрчүүд үгсэн нийлж унагаах гэж байна. Манай 11 эмэгтэй гишүүн эсэргүүцэж байгаа. УИХ-ын дарга болон ажлын хэсгийн ахлагч, намын бүлгийн дарга нарт шаардлага хүргүүлсэн. Эмэгтэйчүүдийг ажлын хэсэгт оруулахгүй байгаа. Бид хэвлэлийн бага хурал хийнэ” гэв.

Сонгуулийн хуульд эмэгтэйчүүдийн квотыг суулгаж өгөх тухай олон жил ярьсан бөгөөд 2011 оны хуульд нам, эвслээс нэр дэвшигчдийн 20-иос доошгүй хувь нь эмэгтэйчүүдийн төлөөлөл байна гэсэн заалт оруулсан юм. Энэ заалт болон 2012 оны сонгуулийн холимог тогтолцооны үр дүнд өнөөгийн парламент 11 эмэгтэй гишүүнтэй байгаа билээ. 

Улмаар өнгөрсөн 2015 оны 12 дугаар сард батлагдсан хуулиар энэ квотыг 30 хувь болгон нэмэгдүүлсэн юм. Харин одоо пропорционал тогтолцоог халах тохиолдолд УИХ-д сонгогдон гарч ирэх эмэгтэйчүүдийн тоо эрс буурч болзошгүй болжээ.