Хүүхдийн тоглоом SOS! зарлаж байна.

"Зууны мэдээ" сонин "Хүүхдийн тоглоом SOS зарлаж байна" хэлэлцүүлгийг өрнүүлж буй. Манай сонины санаачлагыг УИХ-ын гишүүн Ж.Батсуурь дэмжиж байна.

-Аливаа улс орон хүүхэд багачуудыг бүр эхийн хэвлийд бүрэлдэн тогтох үеэс нь хүмүүжүүлж эхэлсэн байдаг. Би "Зууны мэдээ" сонины Даваа гаригийн дугаарт нийтлэгдсэн хүүхдийн тоглоомоос хорт бодис, кадми илэрсэн тухай нийтлэлийг уншаад их эмзэглэсэн. Тийм ч учраас зөв зүйтэй санаачлага гаргасан танай сонины санаачлагыг дэмжиж байна.

Хүүхдийг хүмүүжүүлэх, сэтгэн бодох чадварыг нь хөгжүүлэхэд сургуулийн үйл ажиллагаанаас гадна хүүхдийн тоглоом онцгой нөлөөтэй байдаг нь шинжлэх ухаанаар ч батлагдчихсан. Ялангуяа сүүлийн жилүүдэд янз янзын хүүхэлдэйн кино гарч, орлогоо нэмэгдүүлэх зорилгоор тоглоом их үйлдвэрлэх болсон. Гэхдээ тэд үйлдвэрлэл, борлуулалтаа л нэмэгдүүлэхийг чухалчлахаас биш хүүхдийн эрүүл мэндэд хортой байна уу үгүй юу гэдгийг анхаардаггүй. Бид сүүлиийн үед эм, эм л гээд байна. Үүнтэй адил эмнээс ялгаагүй хүүхдийн тоглоомонд анхаарах ёстой гэж бодож байна.

Өндөр хөгжилтэй орнуудад тоглоомыг үйлдвэрлэхдээ хүмүүжлийн ач холбогдлоос нь гадна эрүүл мэндийн шаардлага хангасан эсэхийг нь онцгойлон анхаардаг юм билээ. Гэтэл эцэг эхчүүд бид хүүхэддээ тоглоом авч өгөхдөө насанд нь тохирсон эсэхийг тэр болгон анзаардаггүй. Бага насны хүүхдэд харшил өгөх, эрүүл мэндэд нь сөргөөр нөлөөлөх үү гэдгийг хайхралгүй авъя гэснийг нь л аваад өгчихдөг. Ихэнх улс оронд энэ тоглоом ийм насны хүүхдэд зориулсан гэж заачихсан байдаг. Тэгэхээр манайхан хүүхдэдээ ямар тоглоом авч өгөх гэж байгаагаа сайн мэдэж, судалдаг баймаар байна. Ялангуяа гадаадын орнуудад хүүхдүүд зурагтай, комик ном их сонирхдог, хэдэн цагаар ч хамаагүй тоглоод, зургийг нь үзээд суучихдаг билээ. Түүн шиг монгол хүүхдүүдийг номтой нөхөрлүүлвэл Хятадын хуванцар тоглоомоор хордуулалгүй оюуны үнэт хөрөнгө оруулалт болно.