Боловсрол, соёл, шинжлэх ухаан, спортын сайд Ж.Батсуурь болон бусад албаны хүмуүс өчигдөр мэдээлэл хийлээ. Мэдээллийн үеэр БСШУС-ын сайд Ж.Батсуурь сэтгүүлчдийн асуултад хэрхэн хариулсныг хүргэе.

-Их, дээд сургуулиудын сургалтын төлбор жил дараалан нэмэгддэг. Төлбөрийн тал дээр ямар бодлого барьж байгаа вэ?

Ард иргэдэд тулгардаг нэг томоохон бэрхшээл бол их дээд сургуулийн сургалтын төлбөр байдаг. Зарим сургуулиудын удирдлагуудтай манай яамны эрхэлсэн газрын хүмуус ярилцсан. Тэгээд бид ямар ч байсан энэ хичээлийн жилд сургалтын төлбөрийг нэмэх бодлого баримтлахгүй гэдэг дээр тохирлоо. Мөн төрийн өмчийн их, дээд сургууль, коллөжийн захирал нарт албан тоот хүргүүлж, зөвлөмж чиглэл өглөө.

Ихэнх сургуулиудын удирдлагатай би өөрөө биечлэн уулзсаны дагуу энэ хичээлийн жилд өнгөрсөн хичээлийн жилийнхээс сургалтын төлбөрөө огт нэмэгдүүлэхгүй байхаар тохиролцож байгаа. Ингэх олон шалтгаан байна.

Монгол Улсын эдийн засгийн нөхцөл байдал хүнд, ажлын байр хомс иргэд орлого багатай, мөнгөний ханшийн уналт гээд олон зүйл бий. Тиймээс их, дээд сургуулиуд сургалтын төлбөрийг ямар ч байсан нэмэгдүүлэхгүй үйл ажиллагаагаа явуулахаар болж байгаа.

-Хувийн хэвшлийн их, дээд сургуулиудын хувьд?

Хувийн их, дээд сургуулиудын холбоо гэж байдаг. Энэ холбооны удирдлагуудтай бас уулзсан. Тэгээд хувийн их, дээд сургуулиуд ч гэсэн сургалтын төлбөрөө нэмэгдүүлэхгүй гэдэг тохиролцоонд хүрсэн.

-МУИС-ийн төлбөр өнгөрсөн жилтэй харьцуулахад нэмэгдсэн гэсэн мэдээлэл гараад байгаа?

МУИС-ийн ректор Р.Бат-Эрдэнэтэй би өөрөө биечлэн уулзсан. Би саналаа хэлсэн. Юу гэсэн бэ гэхээр энэ салбарыг эрхэлсэн сайдаар дөнгөж сая томилогдлоо. Миний баримталж байгаа бодлого төрийн өмчийн их, дээд сургуулиудын хувьд сургалтын төлбөрийг нэмэгдүүлэхгүй байх юм.

Их, Дээд сургуулийн төлбөрийг бодит зардалтай нь харьцуулж байгаад сургуулийн удирдах зөвлөл тогтоодог. Удирдах зөвлөлдөө ийм асуудал санал болгоод надад хариу өгөөрэй гэж хэлсэн. Надад энэ жил огт нэмэгдүүлэхгүй, өөрөөр хэлбэл 2015-2016 оны хичээлийн жилтэй адил төлбөртэй байя гэдгийг бид ярилцаж шийдсэн гэсэн хариу өгсөн.

-МУИС суурь хураамж гэж авдаг. Түүнийг багасгах арга байдаг юм болов уу?

Миний хувьд их, дээд сургуулиудын дотоод үйл ажиллагаатай танилцаж амжаагүй явна. Ажил аваад зургаа хонож байна. Хяналт шинжилгээ, үнэлгээ, дотоод аудитын газар яамны бүтцэд байдаг. Үүнд санхүү, хуулийн мэргэжилтнүүд орж ажиллана. Шаардлагатай бол энэ суурь хураамжийг багасгах боломж байна уу гэдэгт бид хяналт шинжилгээ, үнэлгээ хийнэ гэж бодож байгаа.

Сургуулиудын Удирдах зөвлөлүүдийн талаар санал гомдол нэлээд ирж байна. Тэднийг багцалж байгаад зарим сургуулиудаар газар дээр нь очиж танилцана. Ингэсний үндсэн дээр судалж үзэж байгаад шийдэх боломж байвал бид аль болох суралцагчийг төлбөрөөр дарамтлахгүй байх бодлогыг баримтална.

-Хичээлийн шинэ жилийн бэлтгэл ямар байна?

Хичээлийн шинэ жил, өвөлжилтийн бэлтгэл хангах тухай аймаг, нийслэлийн Засаг дарга нарт зөвлөмж, чиглэл хүргүүлжбайгаа. Үүнд удирдлага зохион байгуулалт, сахилга хариуцлагын талаар авч хэрэгжүүлэх арга хэмжээ орсон.

Мөн барилга, засварын ажил, цэцэрлэг, нэгдүгээр ангийн элсэлт, бүртгэл, сурах бичгийн хангамж, хүрэлцээ, сурагчийн дүрэмт хувцасны талаар авч хэрэгжүүлэх арга хэмжээний зөвлөмж, чиглэлийг хүргүүлж байгаа юм. Аймаг орон нутагг манай Боловсрол, соёлын газрууд үйл ажиллагаагаа явуулдаг.

Тэр газраараа дамжуулаад хичээлийн шинэ жилийн бэлтгэл ажпыг бүрэн хангах болоод сургуулийн дэргэд байгаа дотуур байр мөн есдүгээр сарын 1-нд хүүхдээ хүлээж авах бэлтгэл ажлыг хангах чиглэлээр зөвлөмж чиглэлийг хүргүүллээ. Хүүхдийн хоол, хүнсний эрүүл аюулгүй байдлын талаар ч зөвлөмж чиглэлд тусгасан.

Түүнчлэн БСШУС-ын сайд, нийслэлийн Засаг даргын хамтарсан Цэцэрлэгийн бүртгэл, элсэлтийг зохион байгуулах хүртээмжийг нэмэгдүүлэх зарим арга хэмжээний тухай албан даалгавар гаргалаа. Өнгөрсөн 2015-2016 оны хичээлийн жилтэй харьцуулахад энэ хичээлийн жилд 16 мянган хүүхдээр хүүхдийн цэцэрлэгийн элсэлтийн тоог нэмэгдүүлэхээр зохион байгуулалтын арга хэмжээг авч хэрэгжүүлсэн.

Нэг жилийн хугацаанд шинээр баригдсан цэцэрлэгүүд нэлээд байгаа. Өөрөөр хэлбэл 60 орчим цэцэрлэг ашиглалтад орж 6000 мянга орчим хүүхдийн багтаамжийг нэмэгдүүлсэн.

Мөн дээрээс нь зарим цэцэрлэгийн доторх зохион байгуулалтыг сайжруулж, өрөө тасалгааны ашиглалтыг сайжруулснаар хүүхдийн тоог 6000 орчмоор нэмэгдүүлэх, мөн хувийн компани, аж ахуйн нэгжүүд дэргэдээ цэцэрлэг байгуулж ажиллах лиценз зөвшөөрлийг нь олгох гэх мэтчилэн олон талын арга хэмжээг зохион байгуулснаар хүүхдийн цэцэрлэгт хамрагдалт нэмэгдэх юм.

-Хүүхдийн цэцэрлэгт хамрагдалтын байдал ямар байгаа бол?

Цэцэрлэгийн насны хүүхдийн тоотой харьцуулахад орон нутагт 84.6 хувь байгаа. Аймаг, нийслэлд 70 гаруй хувьтай байхаар бид тооцож байна. Цэцэрлэгт хамрагдалтын хувь Улаанбаатар хотод өнгөрсөн жилээс найм орчим хувиар нэмэгдэж байгаа.

Цаашдаа Улаанбаатар хотын дүүргүүдийн цэцэрлэгийн орны тоо багатай, хүн ам ихтэй хороодод цэцэрлэг барьж байгуулах зохион байгуулалтын арга хэмжээг яаралтай авч хэрэгжүүлэх бодолтой байна.

Улаанбаатар хотын хувьд цэцэрлэг, сургууль нийслэлийн Боловсролын газрын эрхлэх асуудлын хүрээнд байдаг. Энэ арга хэмжээг авч хэрэгжүүлснээр хичээлийн шинэ жилийн өвөлжилтийн бэлтгэл ажил 70 гаруй хувьтай явж байгаа.

-Цэцэрлэгийн хамрагдалт нийслэлд 70 гаруй хувьтай байна гэж байна. Бүртгэлийг хэрхэн зохион байгуулах бол. Мөн төрийн албан хаагчдын хүүхдүүдийг хувийн хэвшлийн цэцэрлэгүүд үнэгүй авч байсан. Энэ цаашаа үргэлжлэх үү?

Цэцэрлэгийн бүртгэл, элсэлтийг шууд хэрэгжүүлэгч нь нийслэлийн Боловсролын газар юм. Тэднийх зохион байгуулна. Гэхдээ аль болох иргэд, хөдөлмөрчдөд чирэгдэл учруулахгүй хийх ёстой. Хуучин хэд хоног дугаарлаж, дараалал үүсгэсэн гэх мэт хэл, ам гардаг байсан. Аль болох тийм байдал үүсгэхгүйгээр зохион байгуул гэдэг үүрэг чиглэлийг нийслэлийн Боловсролын газрын даргад өгсөн. Ер нь янз бүрийн хэлбэрээр зохион байгуулж үзлээ.

Зайлшгүй шаардлага гарвал тодорхой хэсэгт сугалаагаар зохион байгуулахаас өөр хялбар арга байдаггүй юм билээ гэдэг хариулт өгч байна лээ. Төрийн албан хаагчдын хүүхдүүд буюу боловсролын салбарт ажиллаж байгаа багш, ажилчдын хүүхдүүдийгтөрийн бус өмчийн цэцэрлэгт үнэгүй хамруулах санамж бичиг байдаг. Жил бүхэн явагдана гэсэн санамж бичгийн дагуу үйл ажиллагаа үргэлжилнэ. Тоо нь ч өмнөх жилтэй харьцуулбал харьцангуй нэмэгдэнэ.

Энэ хичээлийн жилд их дээд сургуулиуд сургалтын төлбөрөө нэмэгдүүлэхгүй