Цаг уур орчны шинжилгээний газраас 10 дугаар сард цаг агаар ямар байх талаарх урьдчилсан мэдээлэл гаргажээ.

Урьдчилсан төлөвөөр агаарын дундаж температур ихэнх нутгаар олон жилийн дундаж орчим, Монгол Алтайн уулархаг нутаг, Алтайн нурууны өмнөд хэсэг болон зүүн өмнөд говиор дунджаас дулаан, харин хур тунадас ихэнх нутгаар олон жилийн дундаж орчим, Хөвсгөл, Булган, Архангай, Хэнтий, Дорнод, Сүхбаатар, Өмнөговь, Дорноговийн зарим нутгаар дунджаас ахиу тунадас орохоор байгаа аж.

Хур тунадас ахиу орох нутгуудаар цас хайлмагтан мөстөж, мал бэлчээрлэхэд хүндрэлтэй, халтиргаа гулгаа үүссэний улмаас зам тээврийн ажилд хүндрэл үүсч болзошгүй.

2016 оны зуны улирлын цаг агаарын нөхцөл, ургамлын ургалт болон бусад хүчин зүйлийн нөлөөгөөр бэлчээрийн даац, хүрэлцээ муу гарсан Увс, Баян-Өлгий, Ховд, Архангай, Өвөрхангай, Булган, Төв, Дархан-Уул, Хэнтий, Сүхбаатар, Дорноговь, Дундговь аймгуудын зарим сумдын нутгаар мал өвөлжилт хүндэрч болзошгүй байгааг холбогдох мэргэжлийн байгууллагууд одооноос анхаарч ажиллахыг зөвлөж байна.