УИХ дахь МАН-ын бүлгийн ээлжит хуралдаан өчигдөр ширүүн уур амьсгал дунд болж, хэлэлцэж байсан асуудлаа дуусгаж амжилгүй завсарласан юм. Маргаан гарахад нөлөөлсөн гол шалтгаан нь тус бүлгийн нэр бүхий дөрвөн г ишүүн намын дарга С.Батболдод ил захидал өргөн барьсан нь МАН-ын ерөнхий нарийн бичгийн дарга У.Хүрэлсүхийн уурыг барж, улмаар УИХ-ын гишүүн Д.Тэрбишдагватай хэрэлдэхэд хүргэсэн гэлцэж байлаа. Хуралдаан болсон танхимаас Ц.Даваасүрэн гишүүн гарахдаа “Ийм дарга байдаг юм уу” гэж хэлээд гарсан бол Д.Тэрбишдагва гишүүн “Шүүхэд хандана” гэж мэдэгдсэн. Болсон үйл явдлын талаар УИХ-ын гишүүн Ц.Даваасүрэнгээс тодрууллаа.

-Бүлгийн хурал яг юу болчихов. Ерөнхий сайдад өргөн барьсан, ил захидалтай холбоотойгоор маргаан гарсан гэж үнэн үү? Бүлгийн гишүүд захидлын талаар ямархуу байр суурьтай байна вэ?

-Маргаан нь өнгөрсөн сард намын ерөнхий нарийн бичгийн дарга У.Хүрэлсүх тэргүүтэй хүмүүс БНХАУ-д айлчилсан, айлчлалтай холбогдож гарсан юм. Ил захидлыг бүлгээр хэлэлцээгүй болохоор  гишүүд ямар байр суурьтай байгааг  мэдсэнгүй.  Гэхдээ Ерөнхий нарийн  бичгийн дарга ил захидалд тэвчээр  алдаад байх шиг.

-Ил захидалд гурван асуудлыг санал болгосон. Онц их хурал хуралдуулах, Ц.Шинэбаяр гишүүнтэй эв зүйгээ олох, Оюутолгойн гэрээг дахин авч үзэх гэсэн. Ерөнхий нарийн бичгийн даргын хувьд дээрх гурван саналын яг алин дээр тэвчээр алдаад байгаа юм?

-Ц.Шинэбаяр гишүүний асуудал дээр. Тэр хүн Ц.Шинэбаяр гишүүнтэй учраа олох талаас дорвитой зүйл  ярихгүй  байна. Бидний санаа бол  Ц.Шинэбаяр гишүүнтэй арга эвээ олж, нам нэгдмэл  байр  суурьтай байя гэсэн. Гэтэл тэр хүн намын эв нэгдэл ярихаар тэвчээр алдаад байна. Намын ерөнхий нарийн бичгийн дарга хүн тэвчээртэй байх хэрэгтэй биз дээ.

-Гэхдээ Ц.Шинэбаяр гишүүн “Би МАН-д элсэхгүй” гээд байгаа. Тэгэхээр яаж намын удирдлагатай учраа ололцох юм?

-Манай намын гишүүн байсан шүү дээ. Тиймээс олон хувилбарыг судалж үз гэж хэлээд байгаа юм. Маргаантай байсан аливаа асуудлыг хожуу эргээд харахад юунд нь маргалдаж байсан юм бол гэж бодогддог. Түүнтэй ижил “Тэнэгийн ухаан хойно” гэдэг шиг эцэст нь харамсаад хэрэггүй гэж хэлэх гэсэн юм. Тиймээс өнөөдөр байгаа бүх боломжоо авч үз гэсэн санаа. 

-У.Хүрэлсүх дарга та дөрвөн гишүүнд хандаж яг юу гэж хэлсэн юм бэ?

-Хэлдэг  үгээ л  хэлэхгүй юу.

-Ямар ч байсан ноцтой үг хэлжээ гэж ойлгогдохоор байсан. Д.Тэрбишдагва гишүүн “Шүүхэд хандана” гэж хэлээд танхимын хаалгыг хаасан. Та ч гэсэн “Ийм нам гэж юу байдаг юм бэ” гээд их гомдолтой гарсан шүү дээ?

-Ална шүү, шудна шүү гэдэг үгээ л хэлсэн. Хүсвэл бид шүүхэд хандаж  болно. УИХ-ын  гишүүний эрх  чинь халдашгүй.  Бүхэл бүтэн  аймгийн иргэдийн  төлөөлөл  болохоос хувь  хүн биш. Би бол “Ийм намын дарга гэж юу байдаг юм бэ” л гэж хэлсэн. Энэ бол У.Хүрэлсүх даргад хандаж хэлсэн үг. 

-Тэгэхээр Ерөнхий сайдад захидал өгснөөс болж та дөрвөн гишүүнийг занажээ  гэж ойлгож болох уу?

-Тэгсэн.

-Ц.Шинэбаяр  гишүүнийг үзэл  бодол нийлээгүйн  төлөө намаас нь түдгэлзүүлсэн.  Та дөрвөн гишүүнд ч мөн ийм арга хэмжээ авбал  яах  вэ?

-Биднийг хэрхэх нь асуудлын гол асуудал биш. Хамгийн  чухал нь  Монголын  түүхийг  авч явсан  энэ том намыг сүйтгэж болохгүй. Эв нэгдэлтэй, нэгдмэл  зохион байгуулалттай байсан  тэр  улстөрийн  цул  хүчнээрээ байя л гэж зорьж, ил захидал бичсэн. Ц.Шинэбаяр гишүүнийг айхтар  зөрчилдөөнтэй хүн гэж би хувьдаа бодохгүй л байна. 

-Гэхдээ танай намынх нь зүгээс “Маш муу хүн” гэсэн пиарыг хүчтэй хийж байгаа шүү дээ?

-Дарга нар болон намынхан  юу гэх нь чухал биш. Ард  түмэн яг  юу гэж бодож байгаа нь  чухал. 

-Ер нь  та  намынхаа удирдлагын  талаар  та ямар  байр  суурьтай байна вэ?

-Намын  удирдлага  энэ намын  хувь  заяаг  бүрэн  эрхийнхээ хугацаанд авч явна.  Тийм болохоор  Монголын  түүх, тусгаар тогтнолыг  авч явсан энэ том улстөрийн  хүчнийг  сулруулах  юм бол  хариуцлага хүлээж л таарна. 

-Тэгэхээр  С.Батболд дарга ч мөн намын үйл ажиллагааг сулруулж байна гэж ойлгож болох уу?

-Сулрахын  эхлэл тавигдаж байна.  Нэг ч бай, арав ч бай гишүүнээ  алдаж болохгүй. Тийм учраас бид “Нэг  ч гишүүнээ алдахгүй байя” гэж ил захидалдаа бичсэн. 

-Та  бүхэн одоогийн  байр  сууриа яагаад намын ХХVI Их хурлын  үеэр  илэрхийлж болоогүй юм бэ. Тухайлбал, Ц.Шинэбаяр  гишүүн шиг?

-Ц.Шинэбаяр  гишүүн бол  намаас гарч байгаад  тэмцье гэсэн.  Харин  бид  бол  намаа дотроос нь цэвэрлэе  гэж байна шүү дээ. Энэ тухай эхнээс нь хэлсэн,  одоо ч мөн сануулж л  байна. 

-Та дөрөв ил захидлаа өнгөрсөн долоо хоногт Ерөнхий сайдад гардуулсан. Тухайн үед Ерөнхий сайд юу гэж хэлсэн бэ?

-Шийдэх ёстой л асуудал гэж хэлсэн. Тэгэхдээ намын бүлгээр бас хэлэлцүүлнэ гэсэн л дээ.

-Энэ асуудлыг бүлэг хэзээ авч хэлэлцэх вэ?

-Ирэх долоо хоногоос асуудлыг ярих болов уу гэж бодож байна.

-МАХН гэсэн товчлолтой намын  нэр  Улсын бүртгэлийн ерөнхий газарт гэнэт  олноор  бүртгэгдсэн. Үүнийг  МАН-аас  зохион байгуулсан нь үнэн биз дээ?

-Тийм илт юмыг надаас асууж яадаг юм.  Бүгд л нэр  устайгаа тодорхой юм билээ шүү дээ. Би ямар түүнийг  зохион байгуулсан  биш. 

-Энэ намд таныг харьяалагддаг болохоор л асуулаа?

-Тэгвэл би  нэрээ цэвэрлэе.

-Та намынхаа батлахыг гардаж авсан уу?

-Бүлгийн хуралдаан дээр өнөөдөр гардаж авсан.