УИХ-ын гишүүн Ц.Даваасүрэнгээс тoдруулга авав.

-Таныг байнгын хороо, чуулганы хуралдаанд суудаггүй, тойрогтоо ч ажилладаггүй гэж намын удирдлагууд чинь дүгнэдэг юм байна. Үнэхээртийм юмуу?

-Үнэнийг хэлэхэд тойрогтоо хамгийн их очиж, ажилласан нь би. Гэхдээ Хөвсгөлөөс сонгогдсон гурван гишүүн үүнд гомдож болохгүй. Тэгээд ч ер нь тойрогтоо ажиллаж байна уу, үгүй юу гэдгийг нам шүүхгүй. Тойргийн сонгогчид үүнийг шүүн тунгааж, дүн тавих эрхтэй. Намайг хэр сайн ажилласан эсэхийг тойргийн сонгогчдоос асуусан нь дээр шүү дээ.

-Байнгын хороо, чуулганы хуралдаанд суудаггүй, төрийн ажил хийдүүлдэг юм биш үү?

-Өнгөрсөн жил би Төсвийн байнгын хороог ахалж байлаа. Тэгэхэд даргагүй байнгын хорооны хурал болж байсан уу, сана даа.

-Танай намын генсек У.Хүрэлсүх дарга л ингэж хэлсэн байна?

-Нам, төр хоёр хэр хутгалдаж байгаагийн илрэл энэ дээ. Би байнгын байхдаа олон асуудал тавьж байсан. Оюу толгойг ч ярьж л явлаа. С.Ламбаа сайдыг шүүмжилж бай-лаа. Бусад сайд нарын асуудлыг ч сөхөж явсан. Надад тэгж хувирч өөрчлөгдөөд байсан зүйлгүй. УИХ-ын гишүүний үндсэн үүргээ би хэнээр ч хэлүүлэлтгүй биелүүлнэ. Намын удирдлага гэж хүн намайг дарангуйлаад, миний бүрэн эрхийг зогсоох эрх байхгүй. Сүүлийн үед бидний дөрвөн гишүүний бичсэн ил захидлыг тойрсон бөөн юм болж байна. Энэ бол нам хагарах гээд байгаа үйл явдлыг зохицуулахыг хүсэж намын даргадаа бичсэн захидал юм шүү дээ, уг нь. Үүнд болохгүй юм юу ч байхгүй. Бид эв нэгдэлтэй байж сонгуульд ялалт байгуулахаас биш МАН, МАХН болж яваад ямар ч амжилтад хүрэхгүй. Үүнийг л бид хэлсэн юм. Эмзэглээд байх юу байна аа. Дээрээс нь Ашигт малтмалын тухай хуулиа цэгцэлье, тэгэхгүй бол хуулийн цоорхойгоор нэг хэсэг нь баяжаад, нийтээрээ ядуураад байна. Үүнийг зохицуулахад МАН идэвхтэй оролцооч гэсэн юм. Ердөө ийм л зүйл хүссэн. Энэ нь жагсаал хийхэд хүргээд байх асуудал мөн үү.

-Нээрээ МАН-ын оюутны байгууллагынхан жагсаж байна. Тэдний цоллож байгаагаар та тендер болгоноос арван хувь авдаг гэнэ. Үнэн юм уу?

-Өмнө нь миний талаар элдэв сөрөг зүйл сонсогдож байсан уу. Идсэн, уусан, шамшигдуулсан тухай мэдээ сонсогдож байсан уу. Үгүй л байхгүй юу. Харин намын даргадаа ил захидал

бичсэнээс хойш гэнэт ийм зүйл гаргаж ирж байна. Энэ бол зохион байгуулалттайгаар тарааж байгаа худал мэдээлэл гэдэг нь ойлгомжтой.

-Энэ ярьж, хэлж байгаа бүхэн нь тухайлбал 2012 онд дэвшүүлэхгүй гэх нь намын удирдлагуудаас танд ирж байгаа шантааж юм болов уу?

-Ингэж худлаа гүтгэж байгаа нь шантааж шүү дээ. Энэ бол жинхэнэ шантааж. Би хөвсгөлчүүдийг төлөөлөх, Үндсэн хуулиар олгогдсон төрийн эрх барих эрхтэй төлөөлөгч. Тиймээс хэсэг бүлэг хүн юм уу, ямар нэгэн нам надад хариуцлага тооцно гэх мэтээр УИХ-ын гишүүний бүрэн эрхэд халдаж болохгүй. УИХ-ын гишүүний халдашгүй бүрэн эрх гэж юу юм бэ гэдгийг У.Хүрэлсүх дарга өөрөө хамгийн сайн мэднэ. УИХ-ын гишүүний бүрэн эрхэд халдах ямар байдгийг тэр биеэрээ туулж мэдэрсэн дээ. УИХ-ын гишүүн яагаад хамгаалагдах ёстой юм бэ. Ард түмний төлөөлөл болж төрийн эрх барих үүрэгтэй хүмүүс учраас шүү дээ. Тиймдээ ч УИХ-ын гишүүд хэлсэн үгнийхээ төлөө хариуцлага хүлээхгүй байхыг Үндсэн хууль болон УИХ-ын тухай хуулиар хуульчлаад өгчихсөн юм.

-Гэхдээ УИХ-ын бүрэн эрхийн асуудал эндхамаагүй гэж У.Хүрэлсүх дарга хэлээд байгаа

-Яалаа гэж дээ. Намайг Хөвсгөлийн ард түмэн сонгосон. Тэд сонголтоо хийсэн. Ер нь сүүлийн үед болоод байгаа зүйл бол зөвхөн Д.Тэрбишдагва, Ц.Даваасүрэн, Б.Бат-Эрдэнэ, Д.Балдан-

Очир, У.Хүрэлсүх гэсэн хэдэн хүний хоорондын асуудал биш. Нам, төрийн зөрчил болоод хувирлаа. Нам нь дээрээ юм уу, төр нь дээрээ юм уу гэдэг нь ялгагдахаа байлаа.

-Муу амьд явахаар сайн үх гэдэг үгийг танд зориулж хэлсэн байна лээ. Үүнийг яаж хүлээж авч байгаа вэ?

-Ер нь энэ дөрвөн жилийн хугацаанд надад ямар ч дарамт шахалт ирсэн байлаа ард түмний төлөөлөл болсон би өөрчлөгдөхгүй. Хөвсгөлийн сонгогчид надад итгэл хүлээлгэсэн. Би тэдний дуу хоолойг илэрхийлээд явна. Эцэст нь намайг сонгох уу, үгүй юу гэдгээ хөвсгөлчүүд л мэднэ. Би тэдний л эрх ашгийг илэрхийлнэ. Түүнээс биш нам эвслээс "бидний эрх ашгийг илэрхийлсэнгүй" гэж намайг шийтгэнэ гэвэл Үндсэн хууль зөрчинө гэсэн үг.

-Тэгэхээр танд хандаж хэлсэн үгэнд эмзэглэхгүй байна уу. Үүнийг юу гэж ойлгож байгаа вэ?

-Сүрдүүлэг юм байлгүй дээ. Гэхдээ сүрдүүлэг ч бай, юу ч бай би гишүүний үүргээ л биелүүлнэ.

-Энэ нь танд өгч байгаа эцсийн сануулга бололтой. Магадгүй таныг намаасаа хөөж мэдэх нь?

-Тэгж чадахгүй. Ард түмний төлөөллийг нам шүүх тухай асуудал байж болохгүй гэж би хэлсэн. Бидний тавьсан асуудал намд хохирол учруулсан бол дүрмээрээ чөлөөлөх тухай ярьж болох юм. Гэвч тийм зүйл болоогүй шүү дээ.

Ц.Даваасүрэн: Сүрдүүлэг юм байлгүй дээ