Ж.Эрдэнэбат: Энэ сарын 26-нд дөрвөн хүн нас барж, 10 хүний биеийн байдал муу байна гэсэн мэдээлэл ирсэн
Монгол Улсын Ерөнхий сайд Ж.Эрдэнэбат
2016.12.02

Ж.Эрдэнэбат: Энэ сарын 26-нд дөрвөн хүн нас барж, 10 хүний биеийн байдал муу байна гэсэн мэдээлэл ирсэн

УИХ-ын гишүүн О.Баасанхүүгийн хүсэлтээр өнөөдрийн үдээс хойших УИХ-ын чуулганы нэгдсэн хуралдаанаар Дорнод аймгийн Халх гол суманд болсон үйл явдлын талаар Ерөнхий сайд Ж.Эрдэнэбат мэдээлэл хийлээ. 

Монгол Улсын Ерөнхий сайд Ж.Эрдэнэбат

"Дорнод аймгийн Халх гол сумын нутагт үйл ажиллагаа явуулж буй Петрочайна Дачин Тамсаг ХХК-тай гэрээгээр ажиллаж буй “Зөв боломж” ХХК-ийн ажилчид үл мэдэгдэх шингэн зүйлийг архи гэж уусны улмаас хордсон гэсэн мэдээлэл ирсэн. Энэ мэдээлэл анх Дорнод аймгийн Бүсийн оношилгоо, эмчилгээний төвд

2016 оны 11 дүгээр сарын 25-ны 22 цагийн үед ирсэн байна. Мэдээллийн хүрээнд Дорнод аймгийн Бүсийн оношилгоо, эмчилгээний төвөөс тодорхой баг гаргаж, Халх гол сум руу явуулсан. Энэ үед нэг хүн нас барсан, хоёр хүний биеийн байдал хүнд байна гэсэн мэдээлэл ирүүлсэн байдаг. Бүсийн оношилгоо, эмчилгээний төвөөс 23 цаг 15 минутын орчимд хоёр их эмч, хоёр сувилагчтай багийг гаргаж, Халх гол сум руу явуулсан.

2016 оны 11 дүгээр сарын 26-ны 18 цагт Эрүүл мэндийн яаманд архи уусны улмаас дөрвөн хүн нас барж, 10 хүн эмнэлэгт хүргэгдсэн, биеийн байдал муу байна гэсэн мэдээлэл ирсэн.

Энэ мэдээллийн хүрээнд Улсын онцгой комисс яаралтай хуралдаж, Мэргэжлийн хяналтын ерөнхий газрын даргаар ахлуулсан ажлын хэсэг байгуулсан.

Мөн Эрүүл мэндийн яаманд ажлын хэсэг хуралдуулж, мэргэжлийн эмч, зөвлөх, мэргэжилтнүүдийг дайчилсан. Эдгээр ажлын хэсгийг газар дээр очиж, түргэн шуурхай арга хэмжээ авч ажиллах үүрэг, даалгавар өгсөн юм.

Хоёр ажлын хэсэг газар дээр очиж, нөхцөл байдалтай танилцаад, очсон даруйдаа хордлогод орсон иргэдийн амь насыг аврахын төлөө тодорхой арга хэмжээ авсан. Видео хурал хийж, Улаанбаатар хотоос шаардлагатай багаж хэрэгслээ явж байсан учраас маш түргэн хугацаанд иргэдийнхээ амь насыг аврах боломж бүрдсэн.

Ажлын хэсэг газар дээр очиж ажилласнаас хойш хүний амь нас эрсдээгүй.

Газар дээр нь очиж нөхцөл байдалтай танилцсан ажлын хэсгийнхэн энд ирсэн учраас тодруулах зүйл байвал асууж болно."