УИХ-ын чуулганы хуралдаанаар "Монголын үндэсний олон нийтийн радио, телевизийн үндэсний зөвлөлийн гишүүнийг томилох, чөлөөлөх тухай" УИХ-ын тогтоолын төслийг хэлэлцэн баталлаа.

Монголын үндэсний олон нийтийн радио, телевизийн тухай хуулийг 21,7-д заасныг үндэслэн Засгийн газраас Монголын үндэсний олон нийтийн радио, телевизийн үндэсний зөвлөлийн гишүүнд Удирдлага, менежментийн чиглэлээр Х.Чилаажавыг нэр дэвшүүлсэн юм.

Х.Чилаажав нь 1996-1997 онд Монголын радиогийн нийгэм, эдийн засгийн албанд редактор, 1997-1998 онд Монголын радиогийн улс төрийн мэдээллийн албанд парламентын сурвалжлагчаас эхлээд 2005-2011 онд Монголын үндэсний олон нийтийн радио, телевизийн үндэсний зөвлөлийн гишүүн, даргын алба хашиж байсан бол 2016 оноос “Компанийн сайн засаглалыг дэмжих нийгэмлэг” ТББ-ын УЗ-ийн гишүүнээр ажиллаж байна.

Байнгын хорооны санал, дүгнэлтийг үндэслэн Х.Чилаажавыг Монголын үндэсний олон нийтийн радио, телевизийн үндэсний зөвлөлийн гишүүнээр томилохыг дэмжье гэсэн саналын томъёоллоор санал хураахад 46 гишүүн оролцож, 35 гишүүн зөвшөөрч, 76,1 хувийн саналаар Х.Чилаажавыг уг үүрэгт ажилд томиллоо.

Монголын үндэсний олон нийтийн радио, телевизийн үндэсний зөвлөлийн гишүүний үүрэгт ажлаас А.Мөнхбатыг чөлөөлөхийг дэмжье гэсэн саналын томъёоллоор санал хураахад 47 гишүүн оролцож, 36 гишүүн зөвшөөрч, 76,6 хувийн саналаар А.Мөнхбатыг үүрэгт ажлаас нь чөлөөлсөн юм.

А.Мөнхбатыг чөлөөлж, Х.Чилаажавыг томилов