УИХ-ын чуулганы үдээс хойших нэгдсэн хуралдаанаар Хөгжлийн банкны талаар авах зарим арга хэмжээний тухай УИХ-ын тогтоолын төслийг хэлэлцэх байсан. УИХ-ын дэд дарга Ц.Нямдорж уг асуудлыг хэлэлцэх эсэх саналыг сонсоход гишүүд өөр өөр байр суурьтай байлаа. Тухайлбал, УИХ-ын гишүүн Б.Пүрэвдорж Хөгжлийн банкны асуудлаар 5 хоногийн завсарлага авах хүсэлтэйгээ илэрхийлсэн. 

Мөн хаалттай эсвэл нээлттэй горимоор хэлэлцэх дээр ч гишүүд зарчмын зөрүүтэй саналтай байлаа. Ингээд энэ үеэр УИХ-ын гишүүн О.Баасанхүү санал хэлсэн юм. 

УИХ-ын гишүүн О.Баасанхүү:

"Байнгын хороон дээр хаалттай хэлэлцсэн зүйлийг чуулган дээр нээлттэй хэлэлцэх нь зөв үү гэдэгт эргэлзэж байна. Дэгийн тухайд юу гэсэн байдаг юм бол мэдмээр байна?

1.5 тэрбум ам.доллар, 300 сая иен хамгийн сүүлийн мэдээллээр банкуудад 70 сая ам.долларын нийлүүлэлт хийсэн гэж байгаа. Гэтэл яагаад ам.долларын ханш одоо хүртэл буурахгүй байна. Яагаад хангалттай нийлүүлэлт хийгээд байхад 300 орчим сая долларын алдагдалд орчихов? Энд хэн буруутай юм бэ?

Тухайн үеийн МАН-ын гишүүд бондын мөнгөн дээр ажиллаад сонгуулийнхаа мөнгийг олж мөнгө тарааж явсан нь үнэн биз дээ. Эрэлт нийлүүлэлтийн хуулиар бол манай зургаан банк хангалттай доллар авсан.

Тэр их доллар хаачив энэ тухай надад тодорхой хэлээд өгөөч. Аргаа бараад Хятадаас 4,2 тэрбумыг авна гээд ард түмнээ хүртэл доромжлуулахад хүргэж явлаа. Ийм байдалд хүргээд байгаа  хүмүүстээ хариуцлагаа хүлээлгэх тухай яримаар байна нээлттэй хэлэлцэхээр бол. Хаалттай хэлэлцэх гэж байгаа бол би бас нарийн нарийн зүйлүүдийг ярихад бэлэн байна."