Азийн хөгжлийн банкны Зүүн Ази хариуцсан ахлах мэргэжилтэн Клод Бодарт тэргүүтэй төлөөлөгчдийг НББСШУ-ны байнгын хорооны дарга Д.Оюунхорол төрийн ордонд хүлээн авч уулзлаа.

Уулзалтын үеэр ноён Клод Бодарт Азийн хөгжлийн банкнаас санхүүгийн хямралыг гэтлэн давахад Монгол улсад үзүүлж буй 50 сая ам. долларын хөтөлбөрийн зээлийн талаар мэдээлэл өгч, хямралын үед нийгмийн үйлчилгээг ядуу эмзэг бүлэгт чиглүүлэн тэднийг хамгаалах бодлогын нөхцөл, салбарын чиглэлийн яамдын үйл ажиллагааны талаар танилцуулав.

Мөн тэрээр хөтөлбөрийн зээлийн бодлогын нөхцөлийн нэг хэсэг нь нийгмийн халамжийг эмзэг бүлгийн зорилтот бүлэг рүү чиглүүлэх, одоо хэрэгжүүлж байгаа халамжийн хэд хэдэн хөтөлбөрүүдийг нэгтгэж нэг багц болгох нь чухал байгааг онцолсон. Байнгын хорооны дарга Д.Оюунхорол тус байнгын хорооноос боловсруулан Азийн хөгжлийн банканд илгээсэн «Дээд түвшний шийдвэр гаргагч нарын дунд нийгмийн зөвшлийг хангах замаар Монгол Улсын эрүүл мэндийн даатгалын тогтолцоог шинэчлэх нь «төсөл дэмжигдэж санхүүжилт авахаар болсонд талархалтай байгаагаа илэрхийллээ. Мөн «нийгмийн халамжийн тогтолцоо, хууль эрх зүйн орчинг боловсронгуй болгохгүйгээр нийгмийн халамжийн хөтөлбөрүүдийг хэрэгжүүлэхэд хүндрэлтэй байгаа. Бид хэн ядуу гэдгээ тодорхойлох, нийгмийн эмзэг бүлэгт үзүүлэх тусламж дэмжлэг, нийгмийн баялгийг иргэн бүрт хуваарилах, хувь хүртээх асуудлыг шударгаар шийдвэрлэх шаардлагатай байна.

Ажилгүй, орлогогүй иргэд хөдөөд, тэр тусмаа баруун бүсийн аймагт их байна. Энэ нь дэд бүтэц хөгжөөгүй, бараа бүтээгдэхүүний үнэ өндөр байгаатай холбоотой. Ажлын байргүйгээс халамжийн мөнгө орлогын эх үүсвэр болж байна. Иймээс ядуурлыг хэмжих аргачлалтай болох, нийгмийн эрүүл мэндийн даатгалын тогтолцоог боловсронгуй болгох, даатгал иргэддээ шударгаар үйлчилдэг эрүүл мэндийн даатгалын тогтолцоог бий болгох, Эрүүл мэндийн даатгалын тухай хууль эрх зүйн орчинг боловсронгуй болгох, шаардлагатай хуулиудад нэмэлт, өөрчлөлт оруулах тал дээр Байнгын хорооны гишүүд ажиллахаар төлөвлөөд байгаа» хэмээн тэрээр танилцууллаа.

Д.Оюунхорол Азийн хөгжлийн банкнаас санхүүжилт авахаар боллоо