2017.05.02
Оюутны эрдэм шинжилгээний хуралд МУИС-ийн оюутан тэргүүллээ
ММНБИ-ээс 4 дүгээр сарын 28-нд Оюутны эрдэм шинжилгээний хурал зохион байгууллаа. Эрдэм шинжилгээний хуралд 12 илтгэл хэлэлцэгдсэнээс МУИС-ийн 4-р курсын оюутан Л.Оюунзаяа “Ус ашиглалтын өртгийг нөөцөд суурилсан шинэ загвараар сайжруулж, татварын ТТ-17 маягтыг шинэчлэх нь” сэдэвт судалгаагаар тэргүүллээ. Харин 2-р байрыг “Санхүүгийн болон санхүүгийн бус үзүүлэлтүүдэд тулгуурлан хувьцааны оновчтой багц бүрдүүлэх нь”судалгаагаар Мандах бүртгэл дээд сургуулийн 3-р курсын оюутан Б.Амгалан, 3-р байрыг “Аж ахуйн нэгжийн буудайн өртөг тооцолтын аргыг боловсронгуй болгох нь"сэдэвт илтгэлээр ХААИС-ЭЗБС –ийн 4-р курсын оюутан Г.Лхамжав нар эзэллээ.
ММНБИ-ийн гишүүн байгууллага болох “Голден пэйж Аудит” ХХК 15 жилийнхээ ойн хүрээнд энэ удаагийн эрдэм шинжилгээний хурлыг хамтран зохион байгууллаа. Шагнал гардуулах үеэр тус компанийн захирал С.Оюунгэрэл “Мэргэжлийнхээ төлөө гэсэн хүсэл тэмүүллээрээ энэ хуралд оролцож байгаа та бүхэнд баяр хүргэе. Монгол Улсынхаа аудитын үйл хэрэгт ирээдүйд хувь нэмрээ оруулна гэж найдаж байна.” гэсэн бол ММНБИ-ийн дэд захирал М.Соронзонболд “ММНБИ судалгаа, эрдэм шинжилгээний төв байхыг зорьж байгаа. Энэ зорилтоо мэргэжлийн байгуллага дангаараа хэрэгжүүлж чадахгүй. Нягтлан бодогч мэргэжлээр суралцаж байгаа оюутнууд, их дээд сургуулиуд, бусад мэргэжлийн байгууллагуудын хамтын ажиллагааны үр дүнд цааш өргөжүүлэх болно. Үүнд оюутан та бүхний хувь нэмэр ч тус болно. Бид Та бүхнийг үргэлж дэмжиж хамтран ажиллах болно.” гэв.
“Хямралыг боломж болгох нь” сэдэвт эсээ бичлэгийн уралдаан зарлаж дүгнэлээ
ММНБИ-ээс зохион байгуулсан “Хямралыг боломж болгох нь” сэдэвт эсээ бичлэгийн уралдааны дүн гарлаа. Шагналыг оюутны эрдэм шинжилгээний хурлын үеэр гардууллаа. Тус уралдаанд нийт 10 сургуулийн 33 оюутан оролцсоноос “Мандах бүртгэл” ДС-ийн 4-р курсын оюутан Ц.Дуламсүрэн 1-р байр, МУИС-ийн БС-ийн 3-р курсын оюутан Ц.Амгалан 2-р байр, Хүмүүнлэгийн их сургуулийн оюутан М.Ганжаргал 3-р байрыг тус тус эзэллээ.
