УИХ-ын гишүүн, Нийгмийн бодлого, боловсрол, соёл, шинжлэх ухаааны Байнгын хорооны дарга Д.Оюунхорол БНХАУ-ын Бээжин хотноо энэ оны 10 дугаар сарын 17 өдөр болсон  “Хөгжил ба ядуурлыг бууруулах” сэдэвт Олон улсын чуулганд үндсэн илтгэгчээр оролцож “ Монгол Улсын Мянганы Хөгжлийн Зорилтуудын хэрэгжилтийн явц, цаашид бүс нутгийн хэмжээнд анхаарах асуудлууд” сэдвээр илтгэл тавьлаа.

Тэрээр илтгэлдээ Монгол Улс Мянганы Хөгжлийн Зорилтуудаа хэрхэн хэрэгжүүлж үр дүнд хүч байгаа талаар дэлгэрэнгүй танилцуулж, байгаль цаг уурын өөрчлөлт, хуурайшилт, гамшигт үзэгдлийн шинж төлөв нь хүн амын амьдрал ахуй, ядуурлын нэг үндэс болж, тэрхүү шалтгааныг тогтоон байгаль орчны таагүй өөрчлөлт, эвдрэлээс учирч болох эрсдэл нөлөөллийг тооцож үзэхдээ ихээхэн дутагдалтай ажилладагийг цохон тэмдэглэсэн байна.

Мөн ядуурлыг хоёр дахин бууруулах асуудал дэлхий нийт тэр дундаа Монголчуудын сэтгэлийг зовоож буйг дурдаад Мянганы Хөгжлийн Зорилтуудын боловсрол, эрүүл мэндийн талаар дэвшүүлсэн асуудлуудыг хэрэгжүүлэхэд бүс нутгийн түвшинд хамтран ажиллах байнгын зөвлөлдөх механизмыг бий болгох, Ядуурлыг бууруулах Олон Улсын судалгааны Хятад дахь төвийн үйл ажиллагаанд идэвхтэй оролцох механизмыг бүрдүүлж, бүсийн түвшинд хөтөлбөр хэрэгжүүлэх саналтай байгаагаа албан ёсоор илэрхийлсэн байна.