Өнөөдөр Дэлхий дахинаа Нэгдсэн Үндэстний Байгууллагын 63 жилийн ой, НҮБ-ын Өдрийг тэмдэглэж байна.  Монгол Улсын Их Хурлын Нийгмийн бодлого, боловсрол, соёл, шинжлэх ухааны Байнгын хороо, Нэгдсэн Үндэстний Байгууллагын Монгол дахь баг, Нэгдсэн Үндэстний Байгууллагын Залуучуудын зөвлөх хороо хамтран санаачилж анх удаа “ Мини НҮБ” Үндэсний чуулга уулзалтыг  “ Мянганы хөгжлийн зорилтууд ба Залуучууд” сэдвийн хүрээнд зохион байгууллаа.

Монгол Улсын Засгийн газраас 1998 оныг ” Залуучуудын хөгжлийг дэмжих жил”, 2002 оныг ” Оюутны жил” болгон зарлаж залуучуудын идэвхи санаачлагыг өрнүүлэх ач холбогдол бүхий олон үйл ажиллагааг хэрэгжүүлж багагүй амжилтанд хүрсэн билээ.

Цаашид залуучуудын өмнө тулгамдаж буй дараах асуудлуудыг шийдвэрлэх хэрэгтэй байна. Үүнд :

• Залуучуудын хөдөлмөр эрхлэлтийн сүлжээ байгуулах
• Хөдөлмөрийн зах зээлийн зохицуулалт
• Залуучуудын хөдөлмөрийн хөлсний үнэлгээ тогтоох, хөдөлмөр, цалин хөслний асуудалтай холбоотой хууль тогтоомжийн уялдаа холбоог сайжруулах, суралцаад давхар хөдөлмөр эрхлэх боломжийг бий болгох
• Таатай бус нөхцөлд байгаа залуучуудыг ажилд авч тогтвор суурьшилтай ажиллуулж байгаа ажил олгогчдод хөдөлмөр эрхлэлтийг дэмжих сангаас санхүүгийн дэмжлэг үзүүлэх,
• Хөдөлмөрийн зах зээлийн эрэлт хэрэгцээнд нийцсэн мэргэжил эзэмшүүлэх, хөдөлмөрийн зах зээл дээр өрсөлдөх чадварыг нэмэгдүүлэх

Залуусыг дайчлах нь Монгол Улсын нийгэм эдийн засгийн хөгжлийг хурдасгах хамгийн хүчирхэг хөдөлгөгч хүч байх болно. Залууст оюуны хөрөнгө оруулалт хийх нь ядуурлаас гаргах, Мянганы Хөгжлийн зорилтод хүрэхэд ихээхэн дэмжлэг үзүүлж чадна.
Залуу хүмүүст өөрчлөлт хийхэд шаардлагатай эрч хүч, шинэлэг санаа, өөдрөг сэтгэл бий. Тэд эерэг өөрчлөлтийн хүч мөн. Гэвч тэд өнөөдөр бичиг үсэггүй, жирэмслэлт, төрөлтийн эрсдэл, Хүний дархлал хомсдлын вирус/ Дархлалын олдмол хомсдлын аюул болон ядууралд олон саяараа өртөж байна. Дэлхий дээр 500 сая гаруй 15-25 насны өсвөр насны хүүхэд залуус 2 ам.доллар ч хүрэхгүй өртгөөр амь зууж, жил бүр 14 сая 15-19 насны охид хүүхэд төрүүлж ээж болж байна гэдгийг Монгол дахь Нэгдсэн Үндэстний Байгууллагын суурин төлөөлөгч хатагтай Дебора Комини үзэж байна.

Залуу хүмүүсийг өөрсдөд нь хамааралтай шийдвэр гаргахад шууд оролцуулах нь хүний эрхийг баталгаажуулах төдийгүй, залуу хүн бүрийг өөртөө итгэл төгс болгож зөв зүйтэй шийдвэр гаргахад чиглүүлж, тэднийг насан туршдаа хариуцлагатай, идэвхитэй иргэн болж төлөвших эхлэлийг тавина. Хөгжлийн асуудлаар залуусын дуу хоолойг сонсох, Нэгдсэн Үндэстний Байгууллага залуусын санал бодлыг сонсох, ойлгоход дэмжлэг үзүүлэх, залуусын өмнө тулгамдаад байгаа асуудлуудыг шийдвэрлэхэд хамтран ажиллахад цаашид Монгол Улсын Их Хурал анхааран энэхүү чуулганаас гаргасан зөвлөмжийг хэрэгжүүлэхэд дэмжлэг үзүүлнэ.