УИХ-ын дарга Д.Дэмбэрэл МҮЭ-үүдийн холбооны ерөнхийлөгч С.Ганбаатарыг өөрийнх нь хүсэлтээр өчигдөр хүлээн авч уулзаж 2010 оны төсөвтэй холбоотой асуудлаар түүний санал, шүүмжлэлийг сонсч хариулт өгсөн билээ. Энэхүү уулзалтад УИХ-ын Нийгмийн бодлого, боловсрол, соёл, шинжлэх ухааны байнгын хорооны дарга Д.Оюунхорол оролцон өөрийн байр сууриа илэрхийлсэн юм. Тэрбээр сонгуулийн үеэр намуудын мөрийн хөтөлбөрт туссан байгалийн баялгаас иргэн бүрт тэгш хүртээх амлалтыг хэрэгжүүлэх эрх зүйн орчин Хүний хөгжил сангийн хуулиар баталгаажлаа. Ингэснээр тодорхой ажил хөдөлмөр эрхэлж байгаа байнгын орлоготой иргэдээс гадна ядуу эмзэг бүлэг, ялангуяа ямар ч нийгмийн халамж, тэтгэмжид хамрагддаггүй хүмүүсийн амьдралд энэ мөнгө ихээхэн тус дэм болно гэж үзэж байгааг хэлсэн.

Мөн гурван талт хэлэлцээрийн дагуу үйлдвэрчний эвлэлийн байгууллага төсөв хэлэлцэх явцад саналаа гаргах, хяналтын тогтолцоог бий болгож ажиллахад цаашид анхаарах нь зүйтэй. Төсвийн хуваарилалт, тогтолцоонд шинэчлэлт хийх цаг болсон. Үйлдвэрчний эвлэлийн байгууллагын санал санаачлагыг бид анхааралдаа авч зарим нэг тодорхой санал санаачлагыг дэмжин ажиллаж байна. Тухайлбал, 0-18 насны хүүхдийн эрүүл мэндийн даатгалыг эцэг эхээр нь төлүүлэх, ажил олгогч болон иргэдээс төлөх нийгмийн даатгалын шимтгэлийг нэмэгдүүлэх Засгийн газрын санал УИХ-ын чуулганы хуралдаанаар дэмжигдээгүй. Энэ асуудлаар бид адил байр суурьтай байгааг хэлэх хэрэгтэй. Эрүүл мэндийн салбарт ажиллагсдын цалин, орлогыг нэмэгдүүлэх үйлдвэрчний байгууллагын саналыг бид мөн дэмжиж байгаа бөгөөд үүний тулд эрх зүйн шинэ орчин бүрдүүлэх шаардлагатай байгаа юм. Эрүүл мэндийн даатгалын тогтолцоо бодитой бус байгаагаас энэ салбарт ажиллагсдын цалин урамшуулал бага байгааг ч цаашид анхаарах ёстой. Иймд үйлдвэрчний байгууллага аливаа асуудалд зөвшилцлийн замаар үр дүнг нь үзэх зорилгын үүднээс хандах хэрэгтэй “ гэж хэллээ хэмээн УИХ-ын Хэвлэл, мэдээллийн албанаас дамжууллаа.