-Таны хувьд шинэ жил ямар баяр вэ?

-Шинэ жилийн баяр бол хуучин оныхоо ажлыг дүгнэж, шинэ ондоо юу хийхээ дүгнэдэг, нас нэгээр нэмэгддэг том баяр. Арванхоёрдугаар сарын 31-нд гэр бүлтэйгээ баяр тэмдэглэхийг хичээдэг. Мэдээж хувь хүний хувьд ч, албан байгууллагын хувьд ч ирэх ондоо хийх ажлаа зөв тодорхойлох ёстой.

-Таны хувьд өнгөрч буй оныг дүгнэвэл?

-Өнгөрснөө дүгнэж, шинэ онд юу хийхээ төлөвлөдөг тийм л оргил цаг үе ирээд байна. 2008 он хувь хүний хувьд амжилт бүтээл дүүрэн он байлаа. Учир нь, сонгуулийн жил тохиож, улстөрчдийн хувьд уралдаанд хоцрохыг хэн ч хүсдэггүйн адил Завханы ард түмний итгэлийг хүлээж, тэднийгээ төрд төлөөлөх эрхийг олж авлаа.

Надад итгэл хүлээлгэсэн завханчуудынхаа итгэлийг дааж, ажиллаж, амьдрахын төлөө нэлээдгүй зүйлийг тунгааж, бодож, уншиж, судалж сууна. Нөгөө талаас төрийн эрх дээд байгууллагын нэг байнгын хороог толгойлж байгаагийн хувьд манай нийгмийн бодлого, боловсрол, соёл, шинжлэх ухааны байнгын хороо манай улсын нэгдэн орж, дэмжин сайшааж, бас үр шимийг нь багагүй мэдэрч амжаад байгаа “Мянганы хөгжлийн зорилтууд”, “Yндэсний хөгжлийн цогц бодлого” зэрэг дэлхий дахинаа нэр хүндтэй бодлогын баримт бичгүүд болон түүнийг хэрэгжүүлэх чиглэлээр хийгдэж байгаа олон чухал төсөл, хөтөлбөрүүдийг хэрэгжүүлэхээр ихийг хийж бүтээж, даяаршиж буй нийгэмд зохицон амьдрах, өөрийгөө хадгалж хөгжүүлэх, өрсөлдөх чадавхаа өсгөхөөр ажиллаж байна. Ахуй амьдрал алагтай цоогтой, ажил үйлс алдаатай оноотой, сэтгэл эмзэглүүлсэн сөрөг үйл явдлууд болж өнгөрсөн ч алдаа онооны сургамжаа үлдээлээ.

Эдийн засгийн хямралтай зэрэгцээд амьдрал хүндэрч байгаа энэ үед олон зүйл төрөөс зохицуулалт шаардан хүлээж байна. Тэр тусмаа хөдөөгийн малчин, иргэдийн амьдрал улам хүндэрч байна. Сонгогчдоос санал, хүсэлт ирж байгаа. Мэдээж сайн нь саараасаа их гэдэг нь тодорхой. Цагийн шаардлагад нийцсэн санаа бодлоо өргөн ярилцаж, бодлого шийдвэрээ амьдралд уялдуулан зохицуулж хөгжил дэвшлийн нааштай зорилгод урагшаа хамтдаа зүтгэх болно.

-Шинэ жилийн дурсамжаасаа хуваалцахгүй юу. Магадгүй хүүхэд ахуйн шинэ жил хамгийн дурсгалтай нь байх?

-Шинэ жил өөрөө их гоё баяр шүү дээ. Манай хүүхдүүд шинэ жилийн ёолкоо засчихсан. Хоёр хүүхэд том болсон ч өрх тусгаарлаагүй болохоор ээж, аавдаа хүүхэд хэвээрээ. Тийм учраас ёолкоо зассан. Би мөн хүүхэд байхдаа шинэ жилийн сургаар л хамгийн түрүүнд сүлд модыг гоё засаж өгөөч гэж ээжээсээ гуйдаг байсан. Ёолкон дээр тавьсан мөнгөө эгч, ах нартайгаа яг тэнцүүхэн хуваагаад авдаг байлаа. Тэгээд л болж өгвөл өвлийн өвгөнөөс бэлэг авахыг хүснэ. Тэр үеийн өвлийн өвгөний бэлэг гэдэг ганц, хоёр алим, чихэр л байсан. Гэхдээ тэр нь хүүхдэдээ тохирсон хөөрхөн бэлэг болж их баярладаг байсан. Энэ мэтээр олон сайхан дурсамж бий. Одоо бол хүүхдүүдийнхээ сүлд модыг засах дуртай.

-УИХ-ын гишүүний хувьд шинэ жилийн бэлэг, мэндчилгээ хэр хүлээж авч байна вэ?

-Энэ жил төсвийн байгууллагынхныг шинэ жилтэй холбоотой янз бүрийн арга хэмжээ бага зохион байгуулахыг Засгийн газраас анхааруулсан болохоор харьцангуй бага байна. Гэхдээ бид туйлширч болохгүй. Жишээлбэл, олон улсын байгууллага, гадаадын найз нөхдөөс шинэ оны мэндээ дэвшүүлээд, бид бие биеэ мартаагүй байгаа шүү гэдэг сэтгэлийн бэлэг өгч байна.

Тийм учраас “бид та бүхэнтэйгээ хамт байгаа, хамтарч ажиллана” гэдгээ илэрхийлж мэндчилгээгээ илгээж байгаа. Ер нь бид юмыг туйлшруулах дуртай юм. Би эмэгтэй хүн учраас үүнийг хүсдэггүй. Бид чинь өдөр болгон уулзаад байж чаддаггүй. Сонгуулиар жишээ авахад л бидний төлөө цаг хугацаа, сэтгэл санаагаа зориулж хамтран ажилласан олон хүнд магадгүй хэвлэлээр, ил захидлаар дамжуулж хамт байгаагаа илэрхийлж, баярласан талархсанаа хэлэх ёстой. Ер нь “сайн найзууд уулзахгүй удвал дунд нь хогийн ургамал ургадаг” гэсэн үг бий. Тийм учраас хүн гэдэг амьтан өөрөө маш жижигхэн зүйлд баярлаж, өчүүхэн зүйлд гомддог.

Тэр утгаараа мэндчилгээ зэрэг нь цаад агуулгаараа хүнд сэтгэгдэл үлдээж л байдаг. Надад олон мэндчилгээ илгээсэнд би баярлаж байгаа. Тэдэндээ буцаагаад мэндчилгээ илгээх хэрэгтэй. Зарим хүн цаасаар яадаг юм гэх нь бий. Заавал хүмүүс адилхан ойлгох албагүй шүү дээ. Мөн энэ мөчид улиран одож буй хуучин он, угтан айсуй шинэ жилийн торгон зааг энэ үед Монголын нийт ард түмэндээ санаж, сэдсэн үйл хэрэг нь Цаст-Очирваань уулынхаа оргил мэт цалин цагаан өөдрөг байхын ерөөл дэвшүүлье.

Д.Оюунхорол: Ахуй амьдрал алаг цоог ч сургамж дүүрэн он байсан