УИХ-ын 2017 оны хаврын ээлжит чуулган энэ 7 хоногт хаалтаа хийнэ. Энэ долоо хоногийн хуралдаанаар Монгол Улсын 2016 оны нэгдсэн төсвийн гүйцэтгэл болон Багшийн хөгжлийн тухай хуулийн төслийг хэлэлцэхээр төлөвлөжээ.

Даваа гарагт УИХ дахь намын бүлгүүд хуралдах бол үдээс хойш 14.00 цагаас Төрийн албаны тухай хуулийн шинэчилсэн найруулгын төсөл болон Төрийн албаны тухай хуульд нэмэлт, өөрчлөлт оруулах тухай хуулийн төслүүдийг нэгтгэн хэлэлцүүлэгт бэлтгэх үүрэг бүхий ажлын хэсгийн хуралдаан болно.

Тэгвэл Мягмар, Лхагва гарагуудад УИХ-ын дөрвөн байнгын хороогоор 2016 оны төсвийн гүйцэтгэл, санхүүгийн тайлан, санхүүжилтийн хэлэлцээр зэрэг асуудлыг хэлэлцэх юм.

Тодруулбал, Аюулгүй байдал, гадаад бодлогын байнгын хорооны хуралдаанаар Монгол Улсын Засгийн газар, Дэлхийн банкны Олон улсын хөгжлийн ассоциаци хоорондын санхүүжилтийн хэлэлцээрийн төслийг хэлэлцэх товтой байна. Хөтөлбөр нь 3 жилийн хугацаатай 3 үе шаттай байх бөгөөд нийт 29 бодлогын арга хэмжээнээс эхний жилд есийг нь авч хэрэгжүүлэхээр төсөлд тусгажээ.

Мөн байнгын хорооны хуралдаагаар НҮБ-ын “Дугуйт тээврийн хэрэгсэл, дугуйт тээврийн хэрэгсэл дээр суурилуулан ашиглаж болох тоног төхөөрөмжүүд болон эд ангид зориулсан техникийн нэгдсэн шаардлагыг батлах тухай, эдгээр шаардлагыг үндэслэн олгох албан ёсны баталгаануудыг харилцан хүлээн зөвшөөрөх тухай хэлэлцээр”-ийн төслийг хэлэлцэнэ.

Монгол Улс энэхүү хэлэлцээрт нэгдэн орсноор дугуйт тээврийн хэрэгслийн аюулгүй байдал, байгаль орчны нөлөөллийн үзүүлэлтийг сайжруулж, олон улсын худалдааны техникийн саад тотгорыг арилгахад их ач холбогдолтой юм.

Харин Лхагва гарагийн НББСШУ-ны төсөв санхүүтэй холбоотой асуудал хэлэлцэхээс гадна Багшийн хөгжлийн тухай хуулийн төслийн хэлэлцэх эсэхийг шийднэ.

Пүрэв гарагт УИХ-ын чуулганы нэгдсэн хуралдаан болж, Монгол Улсын нэгдсэн төсвийн 2016 оны гүйцэтгэл болон Багшийн хөгжлийн тухай хуулийн төслийг хэлэлцэн, 2017 оны намрын ээлжит чуулганаар хэлэлцэх асуудлыг тогтсоноор УИХ-ын хаврын ээлжит чуулган өндөрлөнө.