“Нийгмийн Ардчилал” Монголын Оюутны Холбоо “Voice of Student-2017” үндэсний форумыг амжилттай зохион байгууллаа.

“Олон улсын оюутны эрхийг хамгаалах өдөр”-ийг тохиолдуулан “Нийгмийн Ардчилал” Монголын Оюутны Холбоо “Voice of student-2017” үндэсний чуулга уулзалтыг зохион байгууллаа. Уг үндэсний форум нь хоёр дахь жилдээ амжилттай зохион байгуулагдсан бөгөөд орон нутгийн оюутны байгууллага болон их, дээд сургууль, коллежийн оюутны холбоо, зөвлөлийн төлөөлөл болох 300 гаруй Монголын шилдэг оюутан залуус оролцож улс эх орныхоо хөгжлийн төлөө өөрсдийн дуу хоолойгоо хүргэсэн юм.

“Voice of Student-2017” үндэсний форум-д УИХ-ын гишүүн, “Нийгмийн Ардчилал” МОХ-ны Ерөнхийлөгч Д.Гантулга, МОХ-ны Дэд ерөнхийлөгч З.Төмөртөмөө, Гэр бүл, хүүхэд, залуучуудын хөгжлийн газрын Залуучуудын хөгжлийн газрын дарга Г.Батдорж, ЭМЯ-ны НЭМГ-ын дарга Д.Ганцэцэг, Хөдөлмөр эрхлэлтийн үндэсний зөвлөлийн Нарийн бичгийн дарга Д.Хадхүү, БСШУСЯ-ны Боловсролын зээлийн сангийн Зээлийн албаны дарга Э.Батсэлэм, “Нийгмийн Ардчилал” МОХ-ны Ерөнхий нарийн бичгийн дарга Х.Энхбат, Нийслэлийн “Нийгмийн Ардчилал” МОХ-ны тэргүүн Х.Алтаншагай нар оролцож бүтэн өдрийг оюутан залуусын үзэл бодол, дуу хоолойг сонсож залууст тулгарч буй асуудлуудыг төрийн хэмжээнд шийдвэрлэх ямар арга зам байгааг хэлэлцэж өнгөрүүлсэн юм.

Чуулга уулзалтанд “Боловсролын асуудлаар төрөөс авч хэрэгжүүлж буй бодлого хөтөлбөрүүд”, “Эрүүл мэндийн асуудлаар оюутнуудад чиглэсэн төрөөс авч хэрэгжүүлж буй бодлого хөтөлбөрүүд”, “Хөдөлмөр эрхлэлтийн асуудлаар оюутнуудад чиглэсэн төрөөс авч хэрэгжүүлж буй бодлого хөтөлбөрүүд” гэсэн 3 сэдвийн хүрээнд хүрэлцэн ирсэн албаны хүмүүс илтгэл тавьж залууст мэдээлэл хүргэсэн юм.

Оюутан залуус:

“Залуучуудын боловсрол”
“Залуучуудын хувь хүний хөгжил”
“Залуучуудын эрүүл мэнд”
“Залуучуудын хөдөлмөр эрхлэлт”
“Залуучуудын оролцоо” гэсэн 5 сэдвийн хүрээнд салбар хэлэлцүүлгийг баг болон хуваагдаж ярилцсаны дараа нэгдсэн хэлэлцүүлгийг өрнүүлж өөрсдийн авсан сэдвийн хүрээнд залууст чиглэсэн бодлогыг төрөөс хэрэгжүүлж болохыг танилцуулсан юм. Залуусын гаргасан санал санаачлагаас “Нийгмийн Ардчилал” Монголын Оюутны Холбооны удирдлагууд хэрэгжүүлж болох ажлуудыг төрийн хэмжээнд авч хэлэлцэхээ амласан бөгөөд оюутан залуусыг ч гар нийлэн оролцохыг уриаллаа.

Оюутан залуусын дуу хоолойг чухалчлан төр засгийн хэмжээнд анхааран ажиллаж байгаа нь Монголын өнөөгийн шинэ залуу улс төрчдийн хүч хөдөлмөр гэж хэлж болно.

“Voice of student” үндэсний форум жил бүр уламжлал болгон зохион байгуулагдах бөгөөд цаашдаа олон улсын оюутан залуусыг хамарсан дэлхийн хэмжээний чуулга уулзалт болох зорилготой юм.

“Voice of Student-2017” үндэсний форум боллоо