Хүн бүрийн амны уншлага болсон "дэлхийн санхүү, эдийн засгийн хямрал" тэдний амьдралд бодитоор нүүрлэсэн болохоор үндэсний үйлдвэрлэгчид айж байна.

Эхнээсээ авахуулаад үйл ажиллагаагаа зогсоож, ажилчдаа урт хугацаагаар амраахад хүрсэн болохоор үйлдвэрийн ажилчид айж байна. Борлуулалт нь буурч, орлого нь багассан үндэсний үйлдвэрлэгчид бор зүрхээрээ тэмцсээр. Гэтэл төр, засгийн зүгээс тэдний үйл ажиллагаанд нэмэр биш нэрмээс болох шийдвэр гаргана. Өнөөх "Үндэсний үйлдвэрлэлийг дэмжих жил" хаачив аа? гэж үйлдвэрийн ажилчид бухимдана. Сэлэнгэ аймгийн Сайхан сум. Социализмын үед энд үйлдвэрлэлийн бүхэл бүтэн цогцолбор боссон. Цементийн үйлдвэрлэлээрээ Монголдоо толгой цохидог Хөтлийн "Цемент-шохой" хувьцаат компанийн хүсэлтээр Зам, тээвэр барилга, хот байгуулалтын сайд очиж үйл ажиллагаатай танилцлаа. Х.Баттулга сайд УИХ-ын гишүүн Э.Бат-Үүлийн хамт мөн УБТЗ-ын төмөр бетон дэрний үйлдвэр, "Хөтөл ган" компани, Эрдэнэтийн "Хөх ган" үйлдвэрээр орлоо.

Үндэсний үйлдвэрлэгчид дотоодынхоо эрэлт, хэрэгцээг хангаж чаддаггүй болохоор барилгын материалынхаа дийлэнх хэсгийг Монгол Улс импортоор авдаг хэмээн бид ярих дуртай. Гэтэл бодит байдлыг харах нь ээ, барилгын материалаа дандаа импортоор авчихдаг болохоор л үндэсний үйлдвэрлэгчид өөдлөхгүй байгаа аж. Хөтлийн "Цемент-шохой" үйлдвэр л гэхэд жилдээ 500.000 тонн цемент, 60.000 тонн шохой үйлдвэрлэх хүчин чадалтай аж.

Тэднийг жаахан дэмжихэд л босоод ирнэ