Энэ сарын 12-ны өдөр Монгол, Францын Гадаад харилцааны яам хоорондын зөвлөлдөх уулзалт Улаанбаатар хотноо болох гэж байна.

Монгол Улсын сайд, Засгийн газрын Хэрэг эрхлэх газрын дарга Г.Занданшатар өнөөдөр Франц Улсаас Монгол Улсад суух Онц бөгөөд Бүрэн эрхт Элчин сайд Элизабет Барсакийг  хүлээн авч уулзан энэ талаар ярилцав.  

Зөвлөлдөх уулзалтын бэлтгэл бүрэн хангагдсан. Францын тал, тэр дундаа Монгол Улсад тууштай үйл ажиллагаа явуулахыг эрмэлздэг аж ахуйн нэгжүүд энэ уулзалтад ихээхэн ач холбогдол өгч байгааг Элчин сайд тэмдэглэлээ. Худалдаа, эдийн засаг болон бусад асуудлаар ярилцах энэ уулзалтаас тодорхой үр дүн гарна гэдэгт итгэж байгаагаа сайд Г.Занданшатар илэрхийлэв.

Талууд хөдөө аж ахуй, мал аж ахуй, археологи, боловсрол, аялал жуулчлал, төв цэвэрлэх байгууламжийн шинэчлэл, уран, хиймэл дагуулын чиглэлээр хамтран ажиллах чиглэлээр санал солилцов гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.