Монголын мэргэшсэн нягтлан бодогчдын институт энэ жилийн уулзалт арга хэмжээгээ “Үнэ цэнэтэй оршихуй” сэдвийн хүрээнд зохион байгууллаа.

Монголын Мэргэшсэн Нягтлан Бодогчдын Институт 4000 гаруй мэргэшсэн нягтлан бодогчид,130 гаруй аудитын компанийг эгнээндээ нэгтгэсэн, нягтлан бодох бүртгэл, аудитын мэргэжлийн байгууллага юм.

Тус институтээс мэргэжлийн мэдлэг боловсролоо дээшлүүлэх, ажлын арга туршлагаа баяжуулахад нь гишүүддээ туслах, санхүүчдэд шинэ мэдээлэл хүргэх тэдний санал зөвлөмжийг сонсох зорилгоор 2014 оноос эхлэн “Жилийн уулзалт” арга хэмжээг жил бүрийн эхэнд зохион байгуулдаг уламжлалтай болсон.

Энэ жилийн уулзалт арга хэмжээ “Үнэ цэнэтэй оршихуй” сэдвийн хүрээнд зохион байгуулагдаж 200 гаруй санхүүчид, мэргэшсэн нягтлан бодогчид оролцлоо.

Техник, технологийн хувьсал, өөрчлөлтүүд нь нягтлан бодох бүртгэл, аудитын салбарт нөлөөлөхийн хэрээр нягтлан бодогч, аудиторуудаас мэргэжлийн ур чадварыг илүү шаардах болсон.Нөгөө талаар улс орны эдийн засгийн өсөлтийг хангахад хөдөлмөрөө зориулдаг, өндөр ур чадвар шаарддаг мэргэжилтнүүд нь өөрсдөө тухайн улс орны баялаг юм.

Ийм учраас энэ удаагийн уулзалтыг зохион байгуулагчид “Үнэ цэнэтэй оршихуй” хэмээн нэрлэж,санхүүгийн боловсролын асуудлыг авч үзлээ гэж зохион байгуулагчид нь онцоллоо.

Монголын Мэргэшсэн Нягтлан Бодогчдын Институтийн гүйцэтгэх захирал Л. Энх-Амгалан

Жилийн уулзалтаар тухайн жилдээ анхаарах чухал асуудал, сэдвийг сонгож гишүүддээ мэдлэг, мэдээлэл хүргэдэг. Энэ жил манай улсын макро эдийн засгийн хэтийн төлөв, олон нийтийн санхүүгийн боловсрол, цахим валютын талаар онцгойлон ярилцаж байна.

Мэргэжлийн хүмүүсээр илтгэл тавиулж, санхүүчид санал бодлоо солилцлоо. Жилийн уулзалтын ач холбогдол жилээс жилд нэмэгдэж, оролцогчид нийслэлээр хязгаарлагдахгүй хөдөө орон нутгаас санхүүчид зорин ирэх нь ихсэж байгаа.

Энэ жил блокчэйн технологи, криптовалютыг олон нийтэд таниулахад анхаарч байна.

Манай гишүүд шинэ мэдээ, мэдээллийг цаг тухай үед нь мэргэжлийн хүмүүс ийн илтгэлээс хүлээн авч байгаадаа талархалтай хандаж байна.

ММНБИ-ын сургалт, төсөл хөтөлбөр, хамтын ажиллагаа хариуцсан дэд захирал Б.Мягмаржав

Манай институт өргөн хүрээтэй олон талаас нь сургалт зохион байгуулдаг, төрийн байгууллагын чиг үүргийг хэрэгжүүлж ажилладаг. Мэргэжлийн байгууллага, Санхүүгийн зохицуулах хороо, Үндэсний аудитын газар, Үндэсний татварын газар гээд мэргэжлийн байгууллагуудтай хамтарч ажилладаг.

Дэлхийн нягтлан бодогчдын холбооны гишүүн, Ази номхон далайн нягтлан бодогчдын холбооны жинхэнэ гишүүн энэ утгаараа цаанаасаа шаардлага тавигддаг. Монгол улсын мэргэшсэн нягтлан бодогч гэдэг бол дэлхийн нягтлан бодогчдын холбооны нэг хэсэг. Жил бүр гишүүдээ тасралтгүй сургах үүргийг манай институт хүлээсэн байдаг.

Тухайлбал жил 40 кредит цагийн нормыг биелүүлсэн байх үүрэгтэй. Тасралтгүй боловсролын сургалт байнга явуулдаг. Мөн мэргэжлийн хүрээнд санхүүгийн тайлагналын ОУ-ын стандарт болон нягтлан бодогчийн бүртгэлийн ОУ-ын стандартыг цаг тухайд нь гишүүддээ танилцуулдаг. Зөвхөн гишүүдээ сургах төдийгүй санхүүгийн хүрээнд сургалт зохион байгуулдаг.

Олон улсад хүлээн зөвшөөрөгдсөн “ Эссэ” хөтөлбөрт сурах боломжтой

Сургалт англи хэл дээр явагдана. Шалгалтыг Англиас Эссэгийн төвөөс хүн ирж шалгадаг. Эх орондоо хямд зардлаар ажлаа хийнгээ сурах боломжийг бид хангаж өгч байгаа. Цаашдаа энэ чиглэлээр хийхээр төлөвлөсөн ажлууд бий гэсэн мэдээллийг өглөө.

Энэ удаагийн Жилийн уулзалт-2018 арга хэмжээг хамтран зохион байгуулагчаар Олон нийтийн санхүүгийн суурь мэдлэгийг дээшлүүлэх хөтөлбөрийг хэрэгжүүлэгч Монголбанкны Олон нийтийн боловсрол мэдээллийн төв, ивээн тэтгэгчээр блокчэйн технологи, криптовалютыг нийтэд таниулахад хувь нэмэр оруулж байгаа Ард Санхүүгийн Нэгдэл оролцлоо.

“Үнэ цэнэтэй оршихуй” жилийн уулзалт зохион байгуулагдлаа