Өнөөдөр Засгийн газар 100 хоногийнхоо тайлан тавилаа. Энэхүү хэвлэлийн бага хурлын үеэр Засгийн газар ХАОАТ-ыг хуучин хэмжээнд болгох мөн тэтгэврийн насыг сонголттойгоор үлдээхээр ОУВС-тай тохиролцоонд хүрсэн гэдгээ мэдэгдлээ. 

ХАОАТ-ын 4 шатлалыг зогсоож, 1 шатлалтай болголоо 

Сангийн сайд Ч.Хүрэлбаатар: ОУВС-тай гэрээ хэлцэл 5 дахь хоног дээрээ үргэлжилж байна. 

ХАОАТ буцаад хуучин байсан хэмжээнд нь болгох шийдэлд хүрсэн.

Тэтгэврийн насны хувьд эргээд хуучнаа сонгох уу? эсвэл шинэ хувилбараа сонгох уу гэдэг нь ахмадуудын өөрсдийнх нь сонголт байхаар шийдэж байна.

Мөн Татварын ерөнхий хууль, ААН-ын орлогын албан татварын тухай хууль, ХАОАТ тухай хуулийг шинэчлэн боловсруулж байгаа. Удахгүй бид яамныхаа вэб сайт дээр тавьж, олон нийтийн хэлэлцүүлгийг хийнэ.

Ерөнхий сайд У.Хүрэлсүх: Дээрх өөрчлөлттэй холбогдуулан хуулийн төслүүдийг өнөөдөр намын бүлэгтээ танилцуулж, ирэх лхагва гаригт УИХ-д өргөн барьж, яаралтай хэлэлцүүлнэ гэлээ.  

/Учир нь хуулиар УИХ-ын намрын чуулган цагаан сарын өмнө буюу 2 сарын 10 өдөр завсарлах ёстой юм/

Гэхдээ Төсөвт тодотгол хийхгүй

Сангийн сайд Ч.Хүрэлбаатар: Татвар нэмэхгүй болсонтой холбогдуулан 2018 оны Төсвийн төсөвт тодотгол хийхгүй. Анх сайд болохдоо л төсөвт тодотгол хийхгүй гэж хэлсэн. Энэ байр суурь дээрээ байгаа.

Төсөвт тодотгол хийхээр төсвийн сахилга бат алдагддаг.

Татвар нэмэх тухай асуудал бол 2017 оны 4 сард батлагдсан. Ингэж 4 шатлалтай болгонгуут ААН-үүд өөрсдөө зохицуулалтыг хийгээд эхэлсэн. Цалингаа бууруулаад, цалингийн бус урамшууллууд нэмэгдүүлсэн.

Энэ татвараас бид 2018 онд 50 тэрбум төгрөг төсөвт төвлөрүүлнэ гэж төлөвлөсөн байсан. Харин сая Сангийн яам тооцож үзэхэд  энэ татвараас 21 тэрбум төгрөгийн орлого л тасрах эрсдэл байна гэсэн тооцоо гарсан.

Мөн АИ80, АИ92 бензиний татварыг тэглэсэнтэй холбогдуулан 60 тэрбум төгрөг төсвийн орлогоос дутна гэж үзэж байгаа.

Бид эдийн засгийн өсөлт, хэрэгжүүлж байгаа арга хэмжээ, төсвийн сахилга бат зэрэг арга хэмжээнүүдтэйгээ уялдаатайгаар төсвийн орлого буурахгүй гэсэн тооцоололтой байгаа.