УИХ-ын гишүүн Ж.Энхбаярын санаачилгаар Боловсролын үнэлгээний төвөөс “Ирээдүйн эзэд” байгалийн ухааны нэгдмэл агуулгын анхдугаар олимпиад амжилттай зохион байгуулагдлаа.

Тус олимпиад нь ЕБС-ийн төгсөх ангийн сурагчдийн цаашид суралцах хүсэл сонирхлыг идэвхжүүлэх, байгалийн ухааны хичээлийн нэгдмэл агуулгын хүрээнд эзэмшсэн мэдлэг, чадварыг сорих, боловсролын үнэлгээнд шинэ технологи нэвтрүүлэн амжилттай нутагшуулах зорилготой. 

Байгалийн ухааны нэгдмэл агуулгад математик, физик, хими, биологи, газар зүйн хичээлүүд багтах бөгөөд эдгээр хичээлүүдээс олимпиадын даалгавар бүрдсэн юм.

Тус олимпиадад Нийслэлийн 200 гаруй сургуулийн шилдэг нэг хүүхэд сургуулиа төлөөлөн оролцлоо. Даалгавар болох 14 хуудас материалыг хүүхдүүд 120 минутанд багтаж гүйцэтгэсэн.

Шалгалтын материалыг сүүлийн үеийн техник, технологийг ашиглан хурдан шуурхай 10 минутанд багтааж шалгасан бөгөөд оноогоо багш, эцэг эхчүүд, хүүхдүүд газар дээр нь дэлгэцээр харж, техник технологийн дэвшлийг харлаа.

“Ирээдүйн эзэд” байгалийн ухааны нэгдмэл агуулгын анхдугаар олимпиадын санаачлан зохион байгуулсан УИХ-ын гишүүн Ж.Энхбаяр дараах зүйлийг онцоллоо.

“Энэ удаагийн олимпиадыг өндөр төвшинд, технологийн ололттой талыг ашиглан Боловсролын Үнэлгээний Төвийн хамт олон сайн зохион байгууллаа. Цаашид ил тод шилэн технологи манай боловсролын салбарт нутагшин үлдэх зөв жишиг суурь тавигдана гэдэгт итгэлтэй байна. Зөвхөн энэ онд 40 гаруй мянган хүүхдүүд ЭЕШ өгнө. Шалгалтын хариу гарах гэж 10 гаруй хоног үргэлжилдэг. Харин сүүлийн үеийн дэвшилтэт технологийг бид боловсролын салбарт нэвтрүүлснээр олон боломж нээлттэй болно. Өнөөдрийн олимпиадад нэвтрүүлж байгаа шинэ техник, технологийг 2019 оны улсын шалгалтад ашиглахаар зорьж байгаа” гэдгийг онцолсон юм.

УИХ-ын гишүүн Ж.Энхбаяр

“Ирээдүйн эзэд” байгалийн ухааны нэгдмэл агуулгын анхдугаар олимпиадын тэргүүн байранд СБД-ийн Сант сургуулийн сурагч М.Мандуул, удаах байранд Багануур дүүргийн Боловсрол Цогцолбор сургуулийн сурагч С.Самбуу, гуравдугаар байранд СХД-ийн “Номуун” сургуулийн сурагч Д.Хишигдалай нар шалгарч,өргөмжлөл, Apple iPad-аар шагнуулсан юм.

Шууд LIVE -ийг та бүхэн Ж.Энхбаяр гишүүний фэйсбүүк хуудсаар дамжуулан үзээрэй.