Нийслэлийн Засаг даргын орлогч Ш.Анхмаагийн санаачлагаар “Эрүүл шүд - Эрүүл хүүхэд” уриан дор Баянгол дүүргийн 16, 17, 18, 19 дүгээр хорооны 3-12 насны 1000 хүүхдэд амны хөндийн үзлэг хийж, шүдний өвчлөлийг үнэ төлбөргүй оношилж, картжуулж, эцэг эхчүүдэд шүдний өвчлөлөөс урьдчилан сэргийлэх талаар зөвлөгөө өгч байгаа аж.

Уг ажлын хүрээнд явуулын шүдний лабораториор Баянгол дүүргийн 242, 11, 198 дүгээр цэцэрлэг, “Оюуны ундраа” цогцолбор сургууль, 47 дугаар сургуулийн бага ангийн сурагчдыг хамруулсан байна. Өнөөдрийн байдлаар нийт 600 гаруй хүүхэд тус үзлэг, оношлогоонд хамрагдаад байгаа аж. Уг үзлэгийг ирэх намраас дахин үргэлжлүүлэхээр төлөвлөсөн байна. Мөн амны хөндийн үзлэгт хамрагдсан 1000 хүүхдийн шүдний өвчлөлийг судалгааг боловсруулах ажлыг эхлүүлж байгаа аж. 

ДЭМБ-аас 2000 онд шүд цоорох өвчнийг олон шалтгаант халдварт өвчин хэмээн халдварт өвчний ангилалд оруулсан байна.

“Амны хөндийн эрүүл мэнд” үндэсний хөтөлбөрийн хүрээнд нийслэлийн хэмжээнд хийсэн судалгаанаас үзэхэд сургуулийн өмнөх болон сургуулийн насны хүүхдийн дунд шүд цоорох өвчний тархалт 2011 оны байдлаар 65-96 хувьтай байжээ. Энэ тоо буураагүй болох нь 2018 онд 1190 хүүхдийн дунд явуулсан судалгаанаас харагдаж байгаа аж. Тус судалгаанд хамрагдсан хүүхдүүдийн дунд шүд цоорох өвчний тархалт 86.2 хувьтай байсан бөгөөд ДЭМБ-ын байгууллагын шалгуур үзүүлэлтээр үнэлэхэд өндөр төвшинд байгаа аж.

Г.САНЖААХАНД