Монгол орны бүх аймаг, сумыг авто замаар холбох зорилгоор Мянганы зам төслийг2001 онд баталсан билээ. Гэвч Мянганы замын чиглэлд өөрчлөлт оруулах бололтой. Энэ саналаа Зам тээвэр, барилга хот байгуулалтын сайд Х.Баттулга УИХ дахь АН-ын бүлгийн өчигдрийн хуралдаанд танилцууллаа.

Мянганы зам төслийн хэвтээ тэнхлэгийн зарим чиглэлтэй давхцахгүй байгаагаас нэг чиглэлд хэд хэдэн салаа замтай болох нөхцеөл бүрдсэн юм байна. Уг төслийн хэвтээ тэнхлэгийн баруун хэсгийн Загастайн зүүн эхний даваа-Идэр хэсэг нь Тарвагатайн  нурууг дайран гарч байгаа. Томоохон уул давааг дайрч байгаа нь авто замын өртгийг нэмэгдүүлэхэд хүргэсэн зэрэг нь төслийг өөрчлөх шалтгаан болжээ. Тиймээс Мянганы замын зүүн чиглэлийг Өндөрхаан-Сүхбаатарын Түмэнцогт-Дорнод аймгийн Хөлөнбуйр-Булган-Чойбалсан-Хамар даваа-Халх гол болгон өөрчлөх төсөл боловсруулжээ. Харин баруун чиглэлд Архангай-Тосонцэнгэл-Улиастай-Ховд-Улаан байшинт гэсэн чиглэлээр Мянганы зам үргэлжилнэ. Өмнө нь хэвтээ тэнхлэгт 2700 км зам барихаар төлөвлөсөн байсан бөгөөд зарим сумын нутгаар дайрахааргүй байв. Харин ЗТБХБЯ-ныхны боловсруулсан дээрх төслөөр Мянганы зам 300 орчим км-ээр уртсах юм байна.