Ерөнхий сайд У.Хүрэлсүх өнөөдөр /2018.11.23/ цаг үеийн асуудлаар Төрийн ордонд мэдээлэл хийлээ.

-МАНАН-Г ТАРААХ ЦАГ БОЛСОН ГЭДГИЙГ ӨНГӨРСӨН 1 ЖИЛИЙН ХУГАЦААНД МЭДЭРЛЭЭ-

Гадуур нийгмийн уур амьсгал бухимдалтай байна. Өнгөрсөн хугацаанд нийтдээ 13 аймгаар явж ажиллаж, ард иргэдтэй уулзлаа. Ард түмэн надаас 2 зүйл хүсч байна. Нэгдүгээрт, нийгэмд шударга ёсыг бэхжүүлж өгөөч. Төрийн албаны бүх шатанд сахилга хариуцлагыг тогтоож өгөөч. Хоёрдугаарт, унаж байгаа эдийн засгийг зогсоож, сэргэлтийг бий болгож өгөөч, цалин мөнгө нэмж өгөөч, ажлын байртай болгож өгөөч, ядуурлаас ангижруулж өгөөч гэсэн хүсэлтийг ард түмэн тавьж байна. Сүүлийн үед хийсэн судалгаануудаас харахад ард түмний хамгийн их хүсэмжилж байгаа зүйл бол шударга ёсны тухай асуудал. Дараа нь ахуй амьдралаа ярьдаг болсон байна.

Надад хоёр зам байна.

Нэгдүгээрт, ард түмний хүсэн хүлээж байгаа шударга ёсыг бэхжүүлэхийн төлөө эр зориг гаргаж ажиллах, эсвэл өөрийнхөө сандал ширээ, зарим нэг хүмүүсийг ажилтай, амьдралтай байлгахын төлөө буулт хийж амьдрах хоёр зам л байна. Би бол нэгдүгээрхийг сонгож байна. Ерөнхий сайд болохдоо "амь насаа алдахаас ч айхгүй байна. Ганцхан зүйлээс айж байна. Энэ бол ард түмний минь итгэл найдвар алдрах вий гэдгээс айж байна" гэж хэлж байсан. Энэ үгийг бүлэг дээр ч, удирдах албан тушаалтнуудад ч олон удаа хэлж байна.

МАНАН гэдэг бүлгийг зайлуулах цаг болсон гэдгийг өнгөрсөн 1 жилийн хугацаанд мэдэрлээ. МАНАН гэж байдаг гэж үнэн юм байна. Нам дамжсан, олигархиуд нэгдсэн, монголын ард түмний өмч хөрөнгөөр баяжсан, бүр сүүлдээ үр хүүхдүүд нь хүртэл монголын төрд шургалсан бүлэгтэй би тэмцэж байна. Заримдаа хүч хүрэхгүй байна. Хуулийн хүч ч хүрэхгүй байна, эрх мэдлийн хүч ч хүрэхгүй байна. Сэтгэл санааны хүч харин байна.

-60 ТЭРБУМЫН БИЧЛЭГТ М.ЭНХБОЛД БАЙСАН НЬ ҮНЭН. ЭВЛҮҮЛЭГ БИШ. ХЭРЭГЖҮҮЛСЭН ЭСЭХИЙГ ХАРИН МЭДЭХГҮЙ БАЙНА-

Би УИХ-ын дарга М.Энхболдыг огцор гэж хэлсэн. Та бол 60 тэрбумын хэрэгт холбогдсон хүн. 60 тэрбумын бичлэг үнэн. Тэр яриаг М.Энхболд хийсэн нь үнэн. Эвлүүлэг биш. Монголын төрийн албан тушаалыг хууль бусаар зарах оролдлого хийсэн. Хэрэгжүүлсэн эсэхийг мэдэхгүй байна. Үүнийг хууль хяналтын байгууллага тогтооно. Үүнийхээ төлөө УИХ-ын дарга огцрох ёстой. Газрын наймаа хийж б айсан нь үнэн. Үүнийхээ төлөө огцор.

УИХ-ын МАН бүлгийн дарга Д.Хаянхярвааг үүрэгт ажлаа өг гэж шаардсан нь үнэн. Тэр хүн санал хураалтаар огцорсон. УИХ дахь МАН бүлгээ удирдаж чадаагүй. Шударга ёсны төлөө ажиллаагүй. 60 тэрбумыг хамгаалсан. Манай бүлгийн шударга гишүүд огцруулж чадсан.

Улаанбаатар хотылн даргыг огцор гэж шаардлага тавьсан. Одоо НИТХ хуралдаж байна. Улаанбаатар хотод сэтгэл гаргаж чадаагүй. Утаатай, замын түгжрэлтэй тэмцэж чадаагүй. Сургууль, цэцэрлэгийг цаг хугацаанд нь бариулж чадаагүй. Ард түмний өмнө тулгамдсан олон асуудлыг сэтгэл гаргаж чадаагүй. Өөрийнхөө дор ажиллаж байгаа хүмүүсийг удирдаж чадаагүй. Үүнийхээ үүднээс огцор гэсэн шаардлага тавьсан.

Энэ гурван шаардлагыг тавьсны дүнд өнөөдөр Засгийн газрыг огцруулах асуудлыг гаргаж тавьсан. Ийм спикер Монгол Улсын төрийг удирдах ёсгүй. Бид багын найзууд. Олон жил улстөрд хамт явсан. Гэхдээ өнөөдөр найзаа бодох уу, намын гишүүнээ бодох уу, улс орноо бодох уу гэдэг асуудал тулгарч байна. Би улсаа бодъё гэж шийдсэн.

60 тэрбумын хэрэг, Эрдэнэтийн асуудал, Стандарт банкны асуудал, Оюутолгой тойрсон асуудлууд, Монголбанк, Хөгжлийн банкны асуудал, бонд, концесстой холбоотой хэргүүдийг шалгаж, буруутай этгээдүүдэд хариуцлага тооцох ёстой. Үндсээр нь өөрчлөхөөс аргагүй.

Тос дотроосоо өтдөг шиг төрийн их цэвэрлэгээ эхэлсэн. Төрөө цэвэрлэх ёстой хүний нэг нь би мөн. Надад хүч тэнхээ, эрх зүйн орчин дутаж байгаа. Монгол Улсын Засгийн газрыг эсэргүүцэж 27 хүн гарын үсэг зурсан. Ямар хүмүүс тэнд зогсож байгааг хараарай. Яриад байдаг 30 гэр бүл тэнд байгаа. Гэр бүл, ах дүү нараараа төрд орсон. Төрийн өмчөөр баяжсан хүмүүс, Монгол Улсын газар нутаг, уул уурхай, газрын доорх баялгаар баяжсан гэр бүлүүд энэ эсэргүүцлийн төлөө амь тэмцэн зүтгэж байна. Миний тэмцэл цаашдаа улам хатуурах болно.

Улс орны эдийн засгийн уналт зогссон. Миний хийж хэрэгжүүлэх ёстой хоёр дахь ажил амжилттай явж байна. Ажил авахад улс орэны эдийн засгийн байдал хүнд байсан. Эдийн засгийн бодит өсөлт 6.3 хүрлээ. Оны эцэст 7, 8-д хүрнэ. Ирэх жил энэ байдлыг тогтвортой хадгална. Бид өөрсдийнхөө бий болгосон ардчилал, шударга ёсгы хамгаалах цаг болсон. Үүнээс хойш бидэнд хугацаа алга. Одоо л эр зориг гаргаж ажиллах болсон.

-ГУДАМЖ ТАЛБАЙД ҮЙМЭЭН САМУУН ГАРГАЖ, 7 САРЫН 1 ШИГ ҮЙЛ ЯВДАЛ БОЛООСОЙ ГЭЖ ХҮСЭХГҮЙ БАЙНА-

Би үндэсний аюулгүй байдлыг зөвлөлийн нэг гишүүн. Би гудамж талбайд үймээн самуун гаргаж, 7 сарын 1 шиг үйл явдал болоосой гэж хүсэхгүй байна. Би парламентын засаглалыг дэмждэг хүн. Монголын ардчиллыг парламентын засаглал аварна гэж боддог хүн. Гэхдээ бид парламентын засаглалаа боловсронгуй болгох ёстой болсон байна. Үнд эн хуулиндаа өөрчлөлт хи йх цаг болсон байна. АРд түмэн үүнийг дэмжиж б айгаа. бид 27 жил энэ Үндсэн хуулиар амьдарлаа. Энэ хуулинд сайн зүйлс бий. Гэхдээ өөрчлөх зүйлс ч байна. Энэ бүхнийг соргог мэдэрч, цаг алдалгүй хийж эхлэх хэр\эгтэй.

-БУРУУТАЙ НЬ НОТЛОГДВОЛ ЖДҮ-ГЭЭС ЗЭЭЛ АВСАН АЛБАН ТУШААЛТНУУДАД ХАРИУЦЛАГА ТООЦСООР БАЙХ БОЛНО-

ЖДҮ-ийн зээлтэй холбоотой асуудлууд байна. ЖДҮ-гээс зээл авсан хүмүүстэй харицлага тооцож байгаа. Төрийн албанд ажиллаж байгаа хүмүүсийг ажлаас нь чөлөөлсөн. Цаашдаа ч чөлөөлөх хүмүүс байна. Хууль хяналтын байгууллагууд шалгаж байна. Хүнийг хэлмэгдүүлж болохгүй. Хууль хяналтын байгууллагаар тогтоогдвол холбогдох албан тушаалтнуудтай дахин хариуцлага тооцно. Намын даргын хувьд ЖДҮ-ээс зээл авсан хүмүүст шаардлага тавьсан. Ард түмнээс уучлалт гуйж, авсан зээлээ яаралтай төл гэж шаардсан. Энэ мөнгийг зориулалтынх нь дагуу зарцуулна. Мөнгө авч чадаагүй ЖДҮ эрхлэгчдэд энэ мөнгийг буцааж олгоно. Засгийн газрын харъяа 22 санд шалгалт оруулсан. Угжирсан, түгжирсэн, идсэн асуудлууд илэрч байгаа. Бид шалгаж, гэм бурууг нь тогтоох ёстой. Энэ сангуудыг нээлттэй болгож, ядарсан, зүдэрсэн, амьдръя гэж байгаа ард түмэнд зээл олгох ёстой. Үүнийг шилэн, нээлттэй болгоно. Монгол Улсын Засгийн газраас одоогоос 2 сарын өмнө хяналт шалгалтыг хийсэн.

У.Хүрэлсүх: 60 тэрбумын бичлэгт М.Энхболд байсан нь үнэн