Нэр бүхий 40 гишүүн УИХ-ын даргыг огцортол чуулганы хуралдаанд оролцохгүй болсныг Л.Болд, Ж.Батзандан, Л.Оюун-Эрдэнэ, Т.Аюурсайхан нарын гишүүд мэдэгдсэн.

Харин өмнөх өдөр нь Ардчилсан намын дарга С.Эрдэнэ "АН-аас нэр дэвшиж, УИХ-ын гишүүн болсон бүх гишүүн бодлогын зөвлөлийн шийдвэрийг дагаж, Засгийг газрыг огцруулах саналыг дэмжих ёстой" хэмээн мэдэгдсэн юм. Үүнтэй холбогдуулан УИХ-ын гишүүн Л.Болдоос зарим зүйлийг тодрууллаа.

-Танай намаас хоёр гишүүн Бодлогын зөвлөлийн шийдвэрээ дагахгүй гэж ойлгож болох уу?

-Хэрэв би ард түмнээс авсан эрх мэдлээ хэн нэгэнд худалдчих юм бол утгагүй биз дээ. Би Үндсэн хууль, ард түмнээ хамгаалж байна. Энэ бол миний үүрэг.

- УИХ-ын дарга огцрох эрх зүйн үндэслэл бий юу?

- Энэ хүн Ерөнхийлөгчийг орлодог. Төрийг хэвийн ажиллуулах хамгийн гол хүн гээд бид Үндсэн хуулиар хамгаалчихсан. Харин үүнийг М.Энхболд хууль бус, ёс суртахуунгүй бүлэглэлийн хамгаалалт болгон хэрэглэж байна. Тэгэхээр бид ард түмэнтэйгээ нийлж М.Энхболдыг өөрөө огцрохыг шаардана. Бидэнд байгаа боломж л энэ. Бидний 40 гишүүн шийдчихдэг бол огцруулмаар байна. Даанч тийм эрх мэдэл алга.

-Та бүхний эсэргүүцэл төрийн хямрал руу аваачих вий гэсэн болгоомжлол байна?

- Энэ бүхнийг нэг талд гаргах хэрэгтэй. Нэг талд нь М.Энхболдын хувь заяа, нөгөө талд нь Монголын ард түмний хувь заяа байгаа. Жингийн туухайд М.Энхболдын албан тушаал, Монголын ард түмний эрх ашиг хоёр байна. Үүнийг л бид олж харах, дуугарах цаг болсон

- Засгийн газрыг огцруулах асуудалд таны байр суурь ямар байгаа вэ?

Засгийн газрыг огцруулах асуудлаар манай намын бүлгийн байр суурь нэг байгаа. Энд эргэлзэх хэрэггүй. Би Засгийн газар хариуцлага хүлээх ёстой гэдэг дээр хамгийн түрүүнд дуугарсан хүмүүсийн нэг. Гэхдээ эхлээд өнөөдөр Засгийн газрыг огцруулах бичиг өргөн барьсан бүлэглэлийн толгойлогч УИХ-ын даргад хариуцлага тооцохгүй бол болохгүй. Цаашид энэ Засгийн газрыг огцруулах асуудалд анхаарна. Одоогийнхоор бол Засгийн газрыг огцронгуут нь энэ бүлэглэл Засгийн газрыг авахыг санаархана. Тэгээд Монголын ард түмнийг ангал руу түлхэнэ. Шударга бусынхаа хонгил руу улстөрчид, сэтгүүлчдийг оруулна. Үүний дараа дахин Монгол улсад шударга сонгууль болохгүй. Монгол улсад ардчилал байхгүй, тусгаар тогтнол байхгүй болно.

Сэтгүүлч Б.Сэлэнгэ

Л.Болд: ЗГ хариуцлага хүлээх нь зөв ч эхлээд М.Энхболд огцрох ёстой