Эрчим хүчний Сайд Ц.Даваасүрэн сар шинийн мэндчилгээ дэвшүүллээ
2019.02.04

Эрчим хүчний Сайд Ц.Даваасүрэн сар шинийн мэндчилгээ дэвшүүллээ

Улс орны хөгжлийн тэргүүлэх салбар болох эрчим хүчний салбарын үе үеийн инженер, техникийн ажилтан, албан хаагч, эрдэмтэн мэргэд, ахмад буурлууд, тэдний гэр бүл болон зорилго нэгт нөхөддөө XVII жарны “Урвуулагч” хэмээх Шороон гахай жилийн сар шинийн мэндийг дэвшүүлж, эрүүл энх, аз жаргал, сайн сайхан бүхнийг хүсэн ерөөж мэндчилье.

 Эрчим хүчний салбар маань  100 орчим жилийн турш цэцэглэн хөгжиж эх орныхоо гал голомтыг илч гэрлээр тасралтгүй найдвартай  хангасаар ирсэн. Өнөөдөр бид хөгжлийн шинэ эринтэй хөл нийлүүлэн алхах эрчим хүчний ирээдүйн чиг хандлагыг тодорхойлон хэрэгжүүлэх  томоохон зорилготой тулгараад байгаа билээ.

Угтан ирж буй шороон гахай жилд “Төрөөс эрчим хүчний талаар баримтлах бодлогыг хэрэгжүүлэх дунд хугацааны хөтөлбөр”-ийг хэрэгжүүлж эхэлж байна.

2019 оныг “Ухаалаг эрчим хүч”-ний жил болгон зарлаж, Монгол Улсын эрчим хүчний системд ухаалаг тогтолцоо бүрдүүлж, хэмнэлт, үр ашгийг дээшлүүлэх зорилтыг дэвшүүлэн ажиллах гэж байна. Жилээс жилд өсөн нэмэгдэж буй эрчим хүчний хэрэглээг хаах зорилгоор ойрын үед эх үүсвэрийн суурилагдсан хүчин чадлыг 350 МВт-аар нэмэгдүүлэхээр төлөвлөж байна.

Мөн жилдээ 200.000 тн сайжруулсан шахмал түлш үйлдвэрлэх хүчин чадал бүхий “Тавантолгой Түлш” үйлдвэрийг ашиглалтад хүлээн авч,  ойрын хугацаанд үйлдвэрийг жилдээ 600.000 тн сайжруулсан шахмал түлш үйлдвэрлэх хүчин чадал бүхий үйлдвэр болгон өргөтгөн гахай жилднийслэлийн агаарын бохирдлыг 50 хувь бууруулах зорилт тавьж байгаа гэх мэт олон ажлыг төлөвлөн хэрэгжүүлж эхлээд байна.

Салбарынхаа нийт хамт олондоо угтан золгож буй Шороон гахай жилдээ амьдрал тань аз жаргалаар дүүрэн , ажил үйлс  тань амжилт бүтээлээр арвин  байхын өлзийтэй ерөөлийг өргөн дэвшүүлье.

Та бүхэн  сар шинэдээ сайхан шинэлээрэй.

Монгол Улсын гал голомт мөнхөд бадрах болтугай!

 УИХ-ын гишүүн, Эрчим хүчний сайд Ц.ДАВААСҮРЭН