Залуу мэргэжилтнүүдийн холбооны Монгол дахь салбараас /The Young Professionals Group – Mongolia Chapter/ 30 хүртэлх насны залуу манлайлагчдыг салбар бүрийн төлөөлөлтэй холбон, тэдний туршлагаас суралцахад туслах зорилготой “Залуу мэргэжилтнүүдийн хөтөлбөр" хэрэгжүүлж байгаа билээ. Тус хөтөлбөрт хамрагдаж буй шилдэг залуустай УИХ-ын гишүүн А.Ундраа өчигдөр /2019.02.21/ уулзан цахим бодлогын асуудлаар санал бодлоо солилцлоо.

Менторшип гэдэг нь өндөр амжилт гаргасан, ажил, амьдралын туршлага, мэдлэг, чадвар арвин хувь хүмүүс өөр бусад туршлага багатай нэгнийг мэргэжлийн хувьд чиглүүлэгч, үлгэр дуурайл үзүүлэгч, мөн зөвлөгчийн үүргийг хувийн болон мэргэжлийн ойр дөт харилцаа холбоо бий болгох замаар гүйцэтгэж байгаа үйл явц юм.

Энэхүү хөтөлбөрийг Залуу мэргэжилтнүүдийн холбооны Монгол дахь салбар (The Young Professionals’ Group – Mongolia Chapter) байгууллагаас санаачлан гурав дахь жилдээ хэрэгжүүлэх гэж байна.
The Young Professionals’ Group буюу Залуу Мэргэжилтнүүдийн Групп нь анх 2000 онд АНУ-д үүссэн түүхтэй. Гол зорилго нь залуучуудад өөрсдийн нөөц бололцоог нээн олж харахад, тэднийг мэргэжлийн хувьд болон хувь хүний хувьд чадавхижуулах, ирээдүйн зорьсон зорилгод нь туслах, зорилгыг нь тодорхойлоход туслах юм.

Өнөөдөр энэхүү хөтөлбөр маань АНУ-ын 3 муж, Сингапур, Монгол, Энэтхэг улсуудад тогтмол үйл ажиллагаа явуулж байгаа төдийгүй Япон, Солонгос, Балба, Испани, Киркизстан улсуудад салбараа нээн өргөтгөхөөр ид ажиллаж байна.

УИХ-ын гишүүн А.Ундраа шилдэг залуустай уулзлаа