Монгол Улсын Ерөнхий сайд У.Хүрэлсүхийн БНКазУ-д хийж буй албан ёсны айлчлал үргэлжилж байна. 

Түүнийг Засгийн газрын ордны үүдэнд БНКазУ-ын Ерөнхий сайд А.У.Мамин угтан авч, ерөнхий сайдуудын ганцаарчичлсан уулзалт 25 минут орчим үргэлжилсэн юм. Үргэлжлүүлэн хоёр улсын Засгийн газар газрын тэргүүнүүд албан ёсны хэлэлцээ хийж, дараах баримт бичгүүдэд гарын үсэг зурах ёслолд байлцлаа.

1. “Иргэний болон эрүүгийн хэргийн талаар эрх зүйн туслалцаа харилцан үзүүлэх тухай Монгол Улс, Бүгд Найрамдах Казахстан Улс хоорондын 1993 оны аравдугаар сарын 22-ны өдрийн гэрээнд өөрчлөлт оруулах тухай протокол”
2. “Терроризмтэй тэмцэхэд хамтран ажиллах тухай Монгол Улсын Засгийн газар, Бүгд Найрамдах, Казахстан Улсын Засгийн газар хоорондын хэлэлцээр”
3. “Боловсролын салбарт хамтран ажиллах тухай Монгол Улсын Боловсрол, Соёл, Шинжлэх ухааны яам, Бүгд Найрамдах Казахстан Улсын Боловсрол, Шинжлэх ухааны яам хоорондын 2008 оны наймдугаар сарын .2ны өдрийн хэлэлцээрт нэмэлт, өөрчлөлт оруулах тухай протокол”
4. “Боловсролын баримт бичиг, эрдмийн зэрэг, цолыг харилцан хүлээн зөвшөөрөх тухай Монгол Улсын Боловсрол, Соёл, Шинжлэх ухаан, Спортын яам болон Бүгд Найрамдах, Казахстан Улсын Боловсрол, Шинжлэх ухааны яам хоорондын хэлэлцээр”
5. “Мал эмнэлэг, хорио цээрийн салбарт хамтран ажиллах тухай Монгол Улсын Засгийн газрын хэрэгжүүлэгч агентлаг Мал эмнэлгийн ерөнхий газар болон Бүгд Найрамдах Казахстан Улсын Хөдөө аж ахуйн яам хоорондын харилцан ойлголцлын санамж бичиг”
6. “Монгол Улсын нийслэл Улаанбаатар хот, Бүгд Найрамдах Казахстан Улсын нийслэл Нур-Султан хот хооронд ах, дүү хотын харилцаа тогтоох тухай хэлэлцээр”
7. “Хамтран ажиллах тухай Монгол Улсын Ургамал, газар тариалангийн хүрээлэн болон Бүгд Найрамдах Казахстан Улсын А.И.Бараеьын нэрэмжит Үхрийн аж ахуйн эрдэм шинжилгээ, үйлдвэрлэлийн төв хоорондын хэлэлцээр”

Бүгд Найрамдах Казахстан Улсын Ерөнхийлөгч Ж.Токаевын санаачилгаар 2019 оны гуравдугаар сарын 23-ны өдөр нийслэл Астана хотын нэрийг Нур-Султан болгон өөрчилсөн. Нур-Султан хотын нийт газар нутгийн хэмжээ 797 км квадрат бөгөөд өнөөдрийн байдлаар нэг сая орчим хүн ам оршин сууж байна.

Нийслэл хот нь төмөр эдлэл, бетон, бетонон барилгын үйлдвэрлэлээр улсдаа тэргүүлэхийн зэрэгцээ барилгын материал, хоол хүнс, механик инженерчлэлийн чиглэлээр үйлдвэрийн салбарыг түлхүү хөгжүүлж байгаа ажээ.