Амгаланбаатар.Х 2019.11.25 | Vip76.mn

МҮЭ-ийн холбооны Ерөнхийлөгч Х.Амгаланбаатар ХНХ-ны дээд сургуулийн багш, оюутнуудтай уулзлаа

МҮЭ-ийн холбооны Ерөнхийлөгч Х.Амгаланбаатар ХНХ-ны дээд сургуулийн багш, оюутнуудтай уулзлаа

МҮЭ-ийн холбооны Ерөнхийлөгч Х.Амгаланбаатар ХНХ-ны дээд сургуулийн багш, оюутнуудтай уулзлаа. МҮЭ-ийн холбооны удирдлага, аппаратын ажилтнууд удирдамж, хуваарийн дагуу гишүүн байгууллага, харъяа газар, анхан шатны хороодоор ажиллаж үйл ажиллагаа, гишүүнчлэл, санхүүгийн байдал, тулгамдаж буй асуудалтай танилцаж байгаа билээ.

Энэхүү ажлыг хүрээнд МҮЭ-ийн холбооны харъяа “Хөдөлмөр нийгмийн харилцааны дээд сургууль”-ийн багш ажилтнуудтай уулзалт хийж МҮЭ-ийн холбооноос хийж хэрэгжүүлж байгаа ажил, НДШ-ийн хоёр хувийн нэмэгдлийн хүрээн дэх жагсаал цуглаантай холбоотой цаг үеийн асуудлаар мэдээлэл өгч ажилтнуудын санал хүсэлтийг сонслоо.

Энэ үеэр ХНХДС-ийн захирал Г.Баярмаа болон Сургалтын албаны дарга Ю.Болормаа нар хийж хэрэгжүүлж байгаа ажлаа тайлагнаж, тулгамдаж буй асуудлын хүрээнд санал солилцов. Тодруулбал сургуулийнхаа ХАБЭА-н Лабораторид хэмжилтийн багаж тоног төхөөрөмж авах, компьютерын лабораторийн техник хэрэгслийг шинэчлэх шаардлагатай байгаа дурдаж байв. Түүнчлэн багш ажилтнууд санал хүсэлтээ илэрхийллээ.

ХНХДС-ийн Эдийн засгийн ухааны тэнхимийн багш доктор.про Ж.Дашхүү “Би хоёр санал хэлмээр байна. Нэгт ҮЭ-ээс нийгмийн ахуй үйлчилгээний салбарын ажилтнуудынхаа өмнө тулгамдаж буй асуудлаар улсын зөвлөгөөн хийж хэлэлцүүлэг өрнүүлж баримт бичиг боловсруулах хэрэгтэй.

Учир нь 1989 оны есдүгээр сард МҮЭ-ийн холбооны тухайн үеийн удирдлагууд Нийгмийн даатгал, амралт сувилал, Хөдөлмөр хамгааллыг төрд шилжүүлэх шийдвэрийг гаргаж байсан. Тухайн үед ҮЭ-ийн байгууллагын шинэчлэл хариуцсан хорооны дэд тэргүүнээр ажиллаж байхдаа эсэргүүцэж таван хуудас хүсэлтийг Н.Лувсанцэрэн даргад өгч байсан.

Хэрвээ улсад НД-ийг өгөх юм бол ард түмэн, ҮЭ-ийн гишүүдээрээ хэлэлцүүлэхийг хүссэн боловч тухайн үедээ шийд нэгэнт гарсан учраас авч хэлэлцээгүй. Одоо гаднын ихэнх улс орнууд төрийн тусгай үйлчилгээг гэрээ байгуулан авч ажиллуулж байгаа. Манайд ч энэ байдал их үгүйлэгдэж байна. Хоёрт их дээд сургуулиудыг нэгтгэж нэгэн дээвэрт оруулахгүй бол энд тэнд тархай бутархай байдалтай байна. Тухайлбал Хөдөлмөр нийгмийн зөвшлийн гурван талт Үндэсний хорооны дэргэд ХНХДС-ийг аваачих асуудлыг судалж үзвэл ямар вэ” гэв.

Мөн ХНХДС-ийн Нийгмийн ухаан зөвлөх үйлчилгээний тэнхимийн, зөвлөх багш Ө.Ариунтуяа МҮЭ-ийн холбоо улс орон даяар үйл ажиллагаагаа явуулдаг маш том байгууллага. Аймаг орон нутаг бүрд ҮЭ-ийн байгууллага байдаг. Манай ХНХ-ын дээд сургууль жилдээ 100 оюутан элсүүлээд байвал санхүүгийн үйл ажиллагаандаа толгой өвтгөхгүй явах боломжтой.

Аймгийн ҮЭ-ийн холбоонд хамгийн багадаа 10 сум байгаа гэж бодохоор бид бүхэнд зах зээлийн хангалттай орон зай байна. Гэвч бид зах зээлийн нөөц боломжоо аль аль талдаа ашиглаж чадахгүй байна. МҮЭ-ийн гишүүдийн хүүхдүүдийг 50 хувийн хөнгөлөлттэй үнээр сургахад болохгүй зүйл байхгүй. Уг нь энэ тал дээр аймаг нийслэл, салбарын ҮЭ-ийн холбоодын дарга нар жаахан л сэтгэл гаргаад зар мэдээллийг түгээгээд өгвөл манай сургуулийн үйл ажиллагаа сайжирах боломжтой. Багш ажилчдынхаа цалин хөлсийг ч нэмэгдүүлэх боломж бүрдэнэ гэлээ.