Эрчим хүчний сайд Ц.Даваасүрэнгээс цаг үеийн асуудлаар зарим зүйлийг тодрууллаа.

-Нийгмийн даатгалын шимтгэлийг ирэх оноос  хоёр хувиар нэмэгдүүлнэ. МАН-ын олонх болсноос хойш нийт дөрвөн хувь нэмж байна. Энэ тал дээр та ямар байр суурьтай байна вэ?

-Нийгмийн давтлагын шимтгэлийг нэмж байгааг би хувь гишүүнийхээ  хувьд сайн зүйл биш гэж бодоод байгаа. Учир нь иргэдийн орлого, компаниудын орлого тийм ч сайн биш байна. Гэтэл үнэ үед татварыг нь нэмэх нь хүнд байх болов уу. Ер нь бол монголчуудыг, татвар төлөгч нарыг шахах гэсэн бодлого ОУВС-аас яваад байна уу гэж би харж байгаа юм.

Оюутолгойн мөнгө нь ордоггүй. Тиймээс ард түмэн нь ядуу байгаа учраас монголчуудын орлогыг бүгдийг шавхуулж байгаад, аж ахуй нэгжүүдийг нь сөхрүүлэх шахуу зүтгүүлж байгаад ядуу байгаа хэсгийг нь амьдралын зуулгатай байлгая гэдэг гаднын бодлого яваад байна уу гэж хараад байгаа юм. Түүнээс биш Оюутолгой дээр болж байгаа, татвараа нууж байгаа гэдэг дээр ОВУС юу ч дуугараагүй байна шүү дээ. Хууль бус үйлдэлд нь нэг ч ам ангайхгүй хэрнэ Монголын татвар төлөгчдийг дарамтлаад байна шүү дээ.

-Нийгмийн даатгалын шимтгэл дээр хуулийг нь өөрчлөхөөр оруулж ирвэл та дэмжих үү?

-Татварын хуулийг хувь гишүүн юм уу, хувь хүн санаачлах нь сайн зүйл биш. Тэр  тусмаа хувийн компани, аж ахуй нэгжтэй хүн байвал муухай зүйл шүү дээ. Татварын асуудал бол хувь хүн санаачлах асуудал биш. Өнгөрсөн хавар баахан татварын хууль батлаад Татварын хуулийн шинэчлэл гэж хийлээ шүү дээ. Түүнийг л бид сайн хийх ёстой байсан. Үргэлж маргаан болоод байхгүйгээр нэг барьж аваад сайн хийх хэрэгтэй. Тэгэхгүй ингээд бүтэн жил үргэлжлээд л дараагийн Татварын хууль нь маргаан болоод яваад байх ёсгүй юм. Татвар ойлгомжтой, иргэдэд дарамт болохооргүй, төлөх боломжтой хэмжээнд байх ёстой.

-Сонгуулийн 50+26 хувилбарыг та яагаад дэмжихгүй байгаа юм бэ?

-Үндсэн хуулийн өөрчлөлтийг хийдээ холимог тогтолцоог Үндсэн хуульд оруулах зорилготой байсан. Хоёр удаа оруулж ирээд унасан. Намын жагсаалтаар орохыг хүсдэг, ард нуугдъя гэдэг хэсэг хүмүүс бий болчихлоо. Сонгууль бүрээр өөрчлөөд будилуулаад байх шаардлага байхгүй гэж үзэж байна. Жагсаалтын 26 нь улс нэг тойрог болоод хүний авсан саналыг нам руу тоолно гэж байгаа. Энэ нь порпорциналь тогтолцоо учраас миний хүлээн зөвшөөрдөггүй тогтолцоо.

Тиймээс би хувь гишүүнийхээ хувьд энэ хувилбарыг хүлээн зөвшөөрөхгүй байгаа. Ер нь бол сонгууль бүрээр өөр, өөр хувилбар оруулж ирээд байгаа нь ард түмнийг төөрөгдөлд оруулчихаад байна. Нэг шинэ хувилбар гаргаад ирдэг. Нөгөөдөхөө ойлгож ядаж байтал дахиад сольчихдог. Тиймээс энэ удаа тогтвортой байя гэсэн саналтай байгаа. Дийлэнх гишүүд энэ удаад тогтвортой байя, ард түмэнд ойлгомжтойгоор сонгуулиа явуулъя гэсэн байр суурьтай байгаа.

-Шөнийн цахилгааны хэрэглээ өмнөх жилүүдээс нэмэгдсэн үү?

-142 мянган айл халуугаар хэрэглэх дэд бүтэц манай улсад бий. Үүнээс нэмэгдүүлэх боломж одоогоор байхгүй. Учир нь өнгөрсөн жилийн шөнийн хэрэглээнээс 30, 40 мегабайтаар өссөн. Энэ нь айлууд халаагуур хэрэглэж байна гэж бид дүгнэж байгаа юм.