"Тавантолгой" төслийн бүтээн байгуулалтын хүрээнд 3.86 тэрбум ам.долларын санхүүжилт шаардлагатай гэсэн тооцоог “Эрдэнэс Тавантолгой” ХК гаргасан байна.

Үүнд конверийн систем, нүүрс баяжуулах үйлдвэр, усан хангамж, Тавантолгой-Гашуунсухайт, Тавантолгой-Зүүнбаян чиглэлийн төмөр зам зэрэг бүтээн байгуулалтууд багтаж байна.

Үүнээс гадна “Эрдэнэс Тавантолгой” ХК 2019 оны цэвэр ашгаас нэгж хувьцаанд 90 төгрөгийн ногдол ашгийг иргэд, аж ахуйн нэгжийн эзэмшиж буй хувьцаанд мөнгөн хөрөнгөөр тооцож олгох ТУЗ-ийн шийдвэрийг хувьцаа эзэмшигчдийн хурлаараа танилцууллаа. Ногдол ашгийг 2020 оны тавдугаар сарын нэгний өдрөөс олгох ажлыг зохион байгуулна.

Мөн цар тахлын үед болж буй энэ удаагийн хурлаар тус компанийг нээлттэй хувьцаат компани болгох асуудлыг шийдвэрлэхэд цаг хугацааны хувьд боломжгүй гэж үзжээ. Хурал Өмнөговь аймагт цахимаар болсон юм.

Тус компани 2019 онд 60 сая дахь тонн нүүрсээ олборлож, нэг тэрбум ам.долларын борлуулалт, нэг их наяд төгрөгийн цэвэр ашигтай ажилласнаа тайлагнаад байгаа юм.