Ж.Ганбаатар 2020.05.29 | Zindaa.mn

Иргэд, ААН үйлчилгээ эрхлэхийн тулд энд тэндээс олон зөвшөөрөл авдаг байдлыг бууруулах сан

Иргэд, ААН үйлчилгээ эрхлэхийн тулд энд тэндээс олон зөвшөөрөл авдаг байдлыг бууруулах сан

УИХ-ын гишүүн, Эдийн засгийн байнгын хорооны дарга Ж.Ганбаатар Зөвшөөрлийн тухай хуулийн ажлын хэсгийг ахалж ажиллаж байгаа билээ. Зөвшөөрлийн тухай хуулийг баталснаар иргэдийн чөлөөтэй хөдөлмөрлөх орчныг бүрдүүлэхэд нэлээд ач холбогдолтой болох ажээ.

Тухайлбал, өнөөдөр Монгол улсад 1450 гаруй зөвшөөрөл байна. ААН-үүд, иргэд тэдгээр зөвшөөрлийг төрөөс авч үйл ажиллагаа явуулах эрхтэй болдог. Зөвшөөрлийн тухай хуулиар одоо байгаа маш олон буюу 1450 зөвшөөрлийг 450 болтол нь буулгах юм. Зөвшөөрөл авъя, сунгуулъя гээд төрийн байгууллагуудыг тойрч, хаалга үүдийг нь тогшиж явдаг байдлыг цөөлөхийн тулд тус хуулийг боловсруулсан.

Зөвшөөрлийн тухай хуулийг баталснаар гол ач холбогдол нь иргэдийн чөлөөтэй хөдөлмөрлөх орчныг бүрдүүлнэ.

Жишээлбэл, Азийн орнуудаар явж байхад хүмүүс гудамж талбайдаа худалдаа эрхэлж, хоол унд хийж, бүжиг цэнгээн явуулж байдаг. Зарим гудамжнуудад аж ахуйн нэгж иргэдэд чөлөөтэй үйлчилгээ үзүүлдэг гэсэн үг. Энэ нь юуг харуулж байгаа вэ гэвэл, тэнд тодорхой хэсэг газарт зөвшөөрөл авах шаардлагагүйгээр үйл ажиллагаа явуулж болдог гэсэн үг. Мэдээж хотынхоо төвийн талбай дээр болохгүй. Эсвэл том худалдааны гудамжинд болохгүй. Харин тодорхой гудамжинд хоол хийж болно, хувцас зарж болно гээд улсаас нь зөвшөөрдөг гэсэн үг. Энэ мэт боломжийг бий болгохын тулд хэтэрхий олон зөвшөөрлүүдийг багасгаж 450 болгож байгаа гэсэн үг. Ирээдүйд нэмэгдэхээр бол Засгийн газрын тогтоолоор УИХ батална. УИХ зөвшөөрлийг нэмж хасна. Түүнчлэн зөвшөөрлийн жагсаалтыг олон талаас нь ярих боломжтой.

Одоо яадаг вэ гэхээр нэг агентлагийн дарга, сум, дүүргийн дарга, хотын дарга шууд гарын үсгээрээ зөвшөөрөл бий болгох нь энүүхэнд.

Гарын үсгээрээ зөвшөөрөл бий болгодог дарга нарын цаана эрх мэдлээ урвуулан ашиглах, авлига, хээл хахуулийн асуудал орхигдолгүй явдаг нь нууц биш ээ. Зөвшөөрлийн тухай хуулиар зөвхөн зөвшөөрлийн тоог бууруулж иргэд, ААН-ийн нуруун дээрх ачааг хөнгөлөөд зогсохгүй төрийн албаны хүнд суртлыг багасгах, цаашлаад авлига, хээл хахуулийн сэдлийг бий болгохгүй байх зэрэг олон ач холбогдолтойг уншигч та тунгаах биз ээ.