Хишгээгийн Нямбаатар бол УИХ-д 2016 онд сонгогдсон шинэ гишүүн. Парламентад авлигын эсрэг бүлэг байгуулагдсан гэж сонсоод УИХ -ын гишүүн Х. Нямбаатартай санал солилцохоор очсон юм. Түүний яриа шударга ёсыг хайж, шүүх проркурорт бий болсон мафийн тогтолцоог нураах ёстойг сануулаад байлаа.

Шинэхэн гишүүн ийн ярьсанд дотроо олзуурхав. Ингээд түүнийг “Цензургүй яриа”-нд урьсан юм. Бидний яриа нийгэмд хууль бусаар хөрөнгөжиж, эрх мэдэл албан тушаалдаа эрдэж Монгол улсын нэрийн өмнөөс алх цохьдог шүүгчдийн хуурамч багийг хуулаад шидчихсэн юм. “Дансандаа сая долларын хадгаламжтай шүүгч байдаг шүү” гэсэн Х.Нямбаатарын үг нийгэмд шүгэл үлээлээ.

Шүүх шударга бус шийдвэр гаргадаг, авлигад идэгдсэн гэдгийг иргэд хоорондоо л ярьдаг байсан болохоос биш Х.Нямбаатар шиг тэр дундаа УИХ-ын гишүүн хүн хамгийн олон үзэгчтэй нэвтрүүлгээр тасхийтэл хэлчих зоригтон олдоогүй л байсан цаг. “Цензургүй яриа” эфирт гарч Х.Нямбаатар яг тэгж хэлсэн мөчөөс ёстой бужигнана гээч нь болов. Эрх мэдлээс нь сүрдээд тэр бүр хөндөж чаддаггүй байсан шүүх эрх мэдлийн шударга бусын тухай тасхийтэл үлээсэн шүгэлийн дуу Монголыг цочоолоо.

Нийгмийг сэрээсэн шүглийн дуунаар Салхитын мөнгөний ордыг Хятад улсын иргэнд хууль бусаар олгоход оролцож авлига авсан 17 шүүгчийн хэрэг нийгмийг зад татав. Х.Нямбаатарыг ард түмэн, ард түмнээс сонгогдсон Ерөнхийлөгч, Засгийн газар тэр чигтээ дэмжлээ. Дэмжихээс аргагүй, дэмжихгүй байх боломжгүй шүгэлийн дуу гэж энэ. Зөвхөн үүнийх нь төлөө Х.Нямбаатар гишүүнд талархах ёстой. Байх ёстой газраа оршиж хэлэх ёстой үгээ хэлнэ гэдэг энэ.

Тэр өнгөрсөн 4 жилд байх ёстой газраа оршиж, хэлэх ёстой үгээ хэлж, хийх ёстой тэмцлээ хийсээр ирлээ. Тэр МАН-ын гишүүн. Энэ намаас өрсөлдөж УИХ-д сонгогдсон. Бүтэн зууныг элээсэн энэ нам юу ч болсон дотооддоо чив чимээгүй, хав даран өнгөрөөж чаддаг дүв дүлий нэгэн цул байлаа.

Гэтэл өнгөрсөн 4 жилд Х.Нямбаатар, Л.Оюун Эрдэнэ тэргүүтэй залуус нам дотроо 60 тэрбумаар төрийн албыг зарах гэсэн хуйвалдааныг илчилж УИХ-ын дарга М.Энхболдыг албан тушаалаас нь огцруулах тэмцлийг эхлүүлсэн юм. 100 жил чимээгүй байсан, 100 жил болох болохгүйтэйгээ эвлэрч “сурсан” энэ намд шинэчлэлийн салхи эхлүүлж чадсаныг НИЙГМИЙГ СЭРЭЭСЭН ШҮГЭЛИЙН ДУУ 3 сая монголчууд мэдэхийн дээдээр мэднэ. Энэ бол шударга ёсны төлөөх тэмцлийн эхлэл болж түүхэнд үлдэнэ. Харин...харин Х.Нямбаатар энэ үйлдлийнхээ төлөө нэлээд “юм” амссан даа.

Дарамт...заналхийлэл... улс төрийн хориг арга хэмжээ...Тэмцэлд амархан ялдаггүй. Ялангуяа шударга ёсны тэмцэлд. Заавал золиос шаарддаг. Харин золиосыг хэн сайн үүрч чадна тэр хатаагдсан болд мэт давтагдаж дахин тэмцэлд босч чаддаг юм. Ингэж чадсан нь өнгөрсөн 30 жилийн түүхэнд гарын 10 хуруунд тоологдом. Би л хувьдаа түүнийг дарамт бүхнийг давж гарсан гэж хэлнэ. Тийм ч учраас өнөөдөр нүүр бардам итгэл төгс үүнийг бичиж сууна... Хорт хавдар. Энэ өвчлөл Монголын нийгмийг айлгаж байна. Монголчуудын нас баралтын зонхилох шалтгаан хорт хавдар.

Өдөр тутам, намайг яг энэ нийтлэлийг бичиж суухад, уншигч таныг миний бичсэнийг уншиж суух тэр цаг мөчид аль хэдийнэ 12-14 хүн тэнгэрийн орноо одсон байгаа. Тэгвэл энэ өвчнийг ялах арга зам байна уу, байна. Хавдрын өвчнөөс урьдчилан сэргийлэх, оношлогоо шинжилгээгээ сайжруулах, ачааллаа даахгүй байгаа ХСҮТ-ийг шинээр барьж дэлхийн жишигт нийцсэн эмнэлэг барих. Ингэж чадвал иргэд маань хашаа байшин байр саваа зараад гадны улсыг зорьдгоо болих юм. Энэ бүхнийг хийх гэж бидний хэдэн нөхөд “Элэг нэгт монголчууд” санг байгуулаад 5 жил болжээ.

Эрх мэдэлтэн, сайд дарга нарын хаалгыг онголзуулж тэдний өмнө бөхөлзсөөр ядарлаа. Харин өнгөрсөн парламентад Х.Нямбаатар гишүүн манай “Элэг нэгт монголчууд” сангийн санаачлагыг дэмжиж ажилласан хүн. Ердөө сарын өмнө гэхэд л манай сангийн шинэ эмнэлэг барьж байгуулах газрыг Сонгинохайрхан дүүрэгт шийдэж 8 га газар олгоход туслалаа. Монголчууд маань бүс нутгийн хэмжээнд дэлхийн хөгжилтэй хөл нийлүүлсэн эмнэлэг барих газартай боллоо гэсэн үг шүү, Х.Нямбаатар гишүүний дэмжлэгтэйгээр. Нийт иргэдийнхээ зовлон шаналал, уй гашууг тархи зүрхээрээ хүлээж авч бусдын зовлонгоос үүрэлцэх хүн бол Х.Нямбаатар гишүүн мөнөөсөө мөн.

Түүний эхлүүлсэн, шүгэл үлээсэн, дэмжиж тусалсан бүхнийг дэмжих цаг боллоо. Сонгинохайрхан дүүрэг бол миний өсч өндийсөн газар. Би “Махимпекс” үйлдвэрт цэвэрлэгч явлаа. Тийм ч болоод өссөн өндийсөн дүүргээ сайн сайхан болоосой, хотын төв, хотын захын ялгаа арилаасай гэж чин сэтгэлээсээ хүсдэг. Энэ л дүүргийн минь төлөө, шударга ёсны төлөө, шүүхийн шинэтгэлийн төлөө, хүн ардынхаа зовлон гунигийг нимгэлэхийн төлөө Хишигээгийн Нямбаатарт итгэж байна.

Тэр очих ёстой газраа очиж, хэлэх ёстой үгээ хэлж, хийх ёстой тэмцлээ үргэлжүүлэх үүрэгтэй. Энэ бол цөвүүн цагийн салхин дор, Монгол төрийн алтан соёмбоны ивээл дор цаг үе нь түүнд хүлээлгэсэн үүрэг. Үүрэг хүлээсэн хүнд зогсох учир байхгүй. Шударга бусын төр мөхөж, шударга ёсны төр мандах учиртай. Мөхөх төрийг биш мандах төрийг байгуулахаар Х.Нямбаатарыг илгээх нь сонгогч та бүхний үүрэг. Үүргээ биелүүлцгээе .

Сэтгүүлч
Л.Мөнхбаясгалан