ЭМЯ, Геронтологийн үндэсний төвийн санаачилгаар ДЭМБ-аас коронавируст халдвар, “шинэ хэв маяг”-ийн үед Улаанбаатар хотод амьдарч байгаа настанд зориулсан олон нийтэд суурилсан цогц тусламж үйлчилгээг гэрийн эргэлтээр хүргэх замаар нэвтрүүлэх хамтарсан төслийг хэрэгжүүлэхэд 160 сая төгрөгийн санхүүгийн туслалцаа үзүүлж байна.

Монгол Улсын 65 буюу түүнээс дээш насны нийт хүн амын 50 хувь нь нийслэл хотод амьдардаг бөгөөд тэдний 6,985 буюу 7 хувь нь эрүүл мэндийн IV, V бүлэгт хамаардаг эрсдэл өндөртэй бүлгийн хүмүүс юм.

“COVID-19”-ийн үед настан, тэр дундаа эрсдэл өндөртэй бүлгийн настанд эрүүл мэндийн нэн шаардлагатай тусламж үйлчилгээг хүргэх ажлын хүрээнд Монголын Ахмадын Холбоотой хамтран 121 сайн дурын ажилтныг гэрийн эргэлт хийх, зөвлөгөө өгөх чиглэлээр сургаж бэлтгэжээ.

Геронтологийн үндэсний төвийн мэргэжлийн баг өрхийн эмч, сувилагч, сайн дурын ажилтнуудтай хамтран ажиллах юм.

Төслийн хүрээнд явуулын эрүүл мэндийн үзлэгийн тоног төхөөрөмжийн тусламжтай хамтарсан баг гэрийн асаргаа болон Батсүмбэр асрамжийн төвийн 7,121 настанд үзлэг хийж, хүмүүнлэг, амин дэмийн багц өгөхөөр төлөвлөжээ. Мөн настанд зориулж бэлтгэсэн боловсролын багцын зэрэгцээ тэдний хэрэгцээнд нийцсэн эрүүл мэндийн зөвлөмж зөвлөгөөг өгөх юм. Түүнчлэн Геронтологийн үндэсний төвийг цахим сургалтын тоног төхөөрөмжөөр хангаж, сайн дурын ажилтнуудад зориулсан сургалт зохион байгуулжээ. Тус цахим тоног төхөөрөмжийг ашиглан 9 дүүрэг, 21 аймгийн ахмадын холбоо, эрүүл мэндийн төвтэй холбогдох боломжтой болж байна.

Насжилт нь дэлхийн хэмжээнд эрчимтэй явагдаж, одоогийн байдлаар дэлхий даяар 65 буюу түүнээс дээш настай 674 сая хүн байна. Насжилтын асуудал нь эрүүл мэнд, нийгэм, эдийн засгийн нөлөөллийг бий болгож байгаа тул дэлхийн чиг хандлага настны эрүүл мэндийг дэмжихээс илүүтэй эрүүл насжилтыг дэмжих чиглэлд шилжиж байна. Энэхүү хамтарсан санаачилга нь "Эрүүл насжилт, настны эрүүл мэнд" үндэсний хөтөлбөрийг дэмжихийн зэрэгцээ ДЭМБ-ын Номхон далайн баруун бүсийн гишүүн улс орнуудтай хамтран хамгийн эрүүл, аюулгүй бүсийг бий болгох хэтийн зорилтод хувь нэмрээ оруулах юм.

Эрсдэл өндөртэй настанд цогц үйлчилгээг гэрээр хүргэх төсөл хэрэгжүүлж байна