Улсын Их Хурлын Эдийн засгийн байнгын хороо өнөөдөр /2020.08.25/ хуралдаж, Монгол Улсын Засгийн газрын 2020-2024 оны үйл ажиллагааны хөтөлбөр батлах тухай УИХ-ын тогтоолын төслийг хэлэлцлээ. Тогтоолын төсөлтэй холбогдуулан УИХ-ын гишүүд асуулт асууж, санал хэллээ.

УИХ-ын гишүүн С.Чинзориг:

“Намын сонгуулийн мөрийн хөтөлбөрт туссан иргэдийн иртгэлийг авсан зорилтуудын дутууг нь оруулаад батлаад явах ёстой байх.

Бид сонгуулийн мөрийн хөтөлбөрт сургууль, цэцэрлэг, эмнэлэг бүрийг ариун цэврийн өрөөтэй, халуун хүйтэн устай болгоно гэж тусгасан. Үүнийг Засгийн газрын үйл ажиллагааны хөтөлбөртөө тусгах шаардлагатай.

Төвлөрлийг бууруулья гэвэл орон нутгийн иргэд төв суурин газраас дутахгүй орчин, нөхцөлд ажиллаж амьдрах нөхцөлийг бүрдүүлэх ёстой. 2016 оны сонгуулийн мөрийн хөтөлбөрт орон нутгийн иргэд сумандаа инженерийн байгууламжтай болгоно гэж тусгасан. Үүнд иргэд их найдлага тавьсан. Тиймээс сумын төвүүдийг инженерийн шугам сүлжээнд холбогдсон цэвэрлэх байгууламжтай болгох, халуун хүйтэн усаар хангах чиглэлд салбарын сайд анхаармаар байна. Монгол Улсыг хөгжүүлэх 5 жилийн үндсэн чиглэл дээр энэ асуудал тусгагдсан ч Засгийн газрын үйл ажиллагааны мөрийн хөтөлбөрт ороогүй байна. Оруулах шаардлагатай байна.

Уул уурхайн чиглэлийн бодлогод өөрчлөлт оруулмаар байна. Хувийн хэвшил өөрийн хөрөнгөөр хайгуул хийлээ гээд тухайн орчин байгаль нь хяналтгүй хаягдаад явдаг. Дэлхийн өндөр хөгжилтэй улс орнуудад төр ч бай хувь ч бай хайгуулаа хийж болно. Хайгуул хийсэн бол нөөцөд төр бүртгэж аваад холбогдох санхүүжилтийг төрөөс шийдэж, олборлох асуудал нь тусдаа шийдэгдэж явдаг. Манайх бол хувийн хөрөнгөөр хийсэн гээд төр оролцож чаддагүй байдал байна. Тиймээс салбарын сайд өөрчлөлт хийх цаг болсон.

Байгалийн баялгийн сантай болох эрх зүйн орчин 2008 онд бүрдсэн. Гэтэл Эвслийн Засгийн газар санг Хүний хөгжлийн сан болгож өөрчилсөн. Норвеги зэрэг байгалийн баялагтай улс орнууд байгалийн баялаг нь нөхөн сэргээгдэшгүй баялаг юм. Түүнийгээ дууссан ч байх үеийнхтэй нь адил орлоготой байх нь гол чиглэл байдаг. Тиймээс энэ бодлогодоо анхаарч ажиллаарай.”