Энержи ресурс" компанийн эсрэг УИХ-ын гишүүн, Зам тээвэр, барилга хот байгуулалтын сайд
Х.Баттулга зогсож байна гэсэн цуу үг тарлаа. Цуу үг үнэн байгаасай. Улс орныхоо ирээдүйд тэрсэлж Монгол Улсаа өмнөд хөршийн эдийн засгийн мөнхийн боол болгохоор санаа шулуудсан "Энержи ресурс"-ийн эсрэг дуугардаг тэднийг сөрдөг хоншоортой аавын хүү олдохгүй байсан юм.

Хэрвээ үнэхээр Х.Баттулга сайд тэдний хийж буйн эсрэг байр суурьтай байгаа бол бидэнтэй нэгдэж түшиг болоосой. Үзэгнээс өөр зэвсэггүй хэдэн сэтгүүлч бичээд өнгөрөлгүй үүнийг Засгийн газар, УИХ-ын хэмжээнд төрийн түшээгийнхээ хувиар асуудал болгож шударга үнэний дуу хоолой болоосой гэж ямар ихээр хүснэ вэ. Монголын үе үеийн төрийн зүтгэлтнүүд улс орныхоо эрх ашгийн төлөө хувийнхаа эд хөрөнгө, амь насаа ч хайрлалгүй зүтгэж байсан олон сайхан жишээ байдагсан.

Оросын дүрвэгсэд, Хятадын түрэмгийлэгчдийн дор нухлуулж байсан тэртээ 1921 онд цэл залуухан Сүхбаатар гэрээ зараад хувьсгалын төлөө явж байсан нь сайхан л санагддаг. Хожмын түүхчид түүнийг юу ч гэж дүгнэсэн нь хамаагүй зөвхөн тэр гэгээн сэтгэлийнх нь төлөө үеийн үед хайрламаар. Бодоо сайд ч гэсэн зандан ширээгээ хэмхлээд төрийн тамга сийлж суусан байдаг. Гэтэл өнөөдөр улсынхаа төлөө ширээгээ эвддэггүй юм гэхэд олигархуудын эсрэг ширүүхэн үг хэлчих түшээ олдохгүй л байна шүү дээ.

"Женко" Х.Баттулгыг Монголын ард түмэн мэднэ ээ. Тэр баян байх. Гэхдээ ард түмнээ архинд живүүлж баяжаагүй. Тэр бензиний ченж хийж өдөр бүхэн үнээ нэмж баяжаагүй. Тэр тендер болгоныг аваагүй. Харин Монголын ард түмэнд олимпийн аварга төрүүлж өгөхөд үнэтэй хувь нэмэр оруулсан юм. "Женко" бөхийн дэвжээнээс анхны олимпын аварга Н.Түвшинбаяр маань зодоглож алтан медалиа зүүхэд Монголын ард түмэн нулимстай баярласан юм шүү. Бас хол ойроос ирсэн айлчин гийчинд үзүүлэх юмтай болгож "Чингисийн ташуур", "XIII зуун" цогцолбор байгуулсан болохоос Сүхбаатарын талбай тойруулан газар авчихаад таван одтой зочид буудал барина гэж худлаа хуурч албан тасалгаа дэлгүүрийн цуглуулга бариагүй юм даг. Х.Баттулгыг үхээд өгөхөд тэдгээр цогцолбор Монголд л үлдэнэ. Тэрийг үзэх гэж жуулчид ирнэ.
Ард түмэн маань олимпын баатартай хэмээн үеийн үед ам бардам ярих болно. "Мах импекс", "Баянгол" зочид буудлыг тэр авсан нь сайн хэрэг. Хэрвээ үнэхээр "Улаанбаатар банк", "Худалдаа хөгжлийн банк", "Капитрон" зэрэг Х.Баттулгынх мөн юм бол ашгүй дээ. Ер нь ганц Х.Баттулга ч биш дампуурч байсан гурилын үйлдвэрийг өөд нь татаж "Алтан тариа" хэмээх үндэсний үйлдвэрлэгчийг бий болгож өгсөн П.Цэнгүүнд, 1991-1998 онд Монголын банкууд мөр мөрөө дэрлэн унаж байхад сөрж зогсон "Голомт" хэмээх банкыг босгож өдий зэрэгтэй авч яваад нь "Бодь" группэд, Монгол морины шандсыг дэлхийд таниулж байгаа "Макс"-ийн Ганбаатарт ч талархах учиртай юм шүү. Тавантолгойн лицензийг гадныханд алдалгүй хадгалж татвараа төлж байсан "Энержи ресурс"-ыг ч орхиж болохгүй. Тэдэнд "Ухаа худаг"-ийг өгсөн нь ч зөв. Монголынхоо хөрөнгийг Монгол хүн авч үлдэнэ гэдэг сайхан хэрэг. Тэд өшөө олон юмыг аваасай.

Гадныхан авч байснаас тэд маань авч байг. Хуваагаад аваг хамаагүй. Гагцхүү тэд гадныхантай нийлэн улс үндэстнийхээ эрх ашгийн эсрэг тэрсэлж болохгүй. Энэ бол хориотой бүс. Тэгвэл энэ удаа "Энержи ресурс" Ухаа худагаас Гашуун сухайт хүртэл төмөр зам тавих юм бол улс орныхоо эрх ашгаас урвасан хэрэг болно. Тэд өөрсдөдөө зориулж төмөр зам тавина гэж байна. Тэр төмөр зам нь Хятадын төмөр замтай шууд уулзаж Монголын нүүрсийг Хятадуудад хямдхан зарж ашиг олж баяжина гэж байна. Тэгвэл нөгөө талд нь Сайншанд, Даланзадгадад хот барьж үйлдвэр байгуулан түүхий нүүрсээ бүтээгдэхүүн болгон боловсруулъя гэж байна. Үйлдвэрээ дагаж олон мянган хүн ажилтай болж тэнд Эрдэнэт шиг хот бий болно.

Нүүрсээ зөвхөн Хятад руу хямдхан зарж байхаар Даланзадгад-Сайншандын чиглэлд төмөр зам тавьчихаад Зүүн Хойд Ази, Европ, Хятад руу нэмүү өртөг шингээн үнэ хүргэж экспортловол арай илүү ашиг олно. Хэрвээ "Энержи ресурс" төмөр замаа тавьчихвал Хятадууд тэр замаар хэд дахин хямдхан нүүрс авах тул үйлдвэр, хот байгуулах хэрэгцээгүй болно. Хятадууд дуртай цагтаа нүүрснийхээ үнийг буулга хэмээн бойкат хийх болно. Тэгэхээр Ухаа худагаас Гашуун сухайт руу төмөр зам тавьж "Энержи ресурс" буюу Петровис, АПУ, MCS-ийг баяжуулах уу, ажилгүй байгаа ард түмэндээ ажил бий болгож газрын хэвлий дэх баялгаа өндөр үнэтэйгээр бусад орон руу зарах уу гэдэг сонголт бидний өмнө байна. Алийг нь сонгох вэ. Энэ сонголтыг хийхэд хүн бүрийн хүчин зүтгэл хэрэгтэй.

Өөрсдийнхөө сонгосон гишүүд руу утасдаж мессэж бичиж чихнээс нь хонх уях нь иргэн бүрийн үүрэг гэж бодно. Нийтлэлийн эхэнд бичсэн шиг минь энэ үйл ажиллагааг "Женко" Х.Баттулга удирдвал юутай сайн. Тэр Зам тээвэр, барилга хот байгуулалтын сайд бас тэгээд ард түмэн түүнд итгэдэг шүү дээ.