УИХ-ын Төсвийн байнгын хорооны дарга Ц.Даваасүрэн өчигдөр Монгол Улсын 2011 оны төсвийн тухай хуулийг баталсантай холбогдуулан хэвлэлийнхэнд мэдээлэл хийлээ. Хэвлэлийн бага хуралд УИХ дахь AH, МАН-ын бүлгийн төсвийн асуудал хариуцсан ажлын хэсгийг ахалсан гишүүн Д.Ганхуяг, Д.Дондог нар оролцсон. Төсвийн байнгын хороон дарга Ц.Даваасүрэн хэлэхдээ "Энэ удаагийн төсөв Монгол Улсын хөгжлийн хурдыг илтгэсэн онцлог төсөв байлаа. Одоогоос арван жилийн өмнө төсвийн хөрөнгө оруулалтын хэмжээ 30 тэрбум төгрөгөөр хэмжигддэг байсан бол энэ удаад түүнээс 20 дахин их мөнгийг УИХ хөрөнгө оруулалтад зарцуулахаар баталлаа. Төсвийн төсөлд гишүүд, иргэний нийгмийн байгууллага, хэвлэлийнхэн шүүмжлэлтэй хандсан учраас Засгийн газар төслөө эргүүлэн татаж дахин өргөн барьсан. Төсвийн алдагдлын хэмжээг харьцангуй өндөр хувьтай баталлаа. Хөгжлийн шинэ цаг үед шийдэх асуудал хөрөнгийн хувьд томорсон байсныг онцлох хэрэгтэй болов уу. Бүтээн байгуулалтын хөрөнгө оруулалт болгоныг улсын төсөвт багтаах боломж байхгүй. Засгийн газар төслөө сайжруулж өргөн барихдаа хөрөнгө оруулалтын хэмжээг 627 тэрбумаар нэмсэн. Энэ бол алдагдлын хэмжээ өссөн эхний шалтгаан. Хоёрдугаарт Засгийн газрын үйл ажиллагааны хөтөлбөрийг хангах суурь жилийн төсөв гэдгээрээ онцлог байсан. Иргэн бүрт эх орны хувь, хишиг болгож cap бүр 21 мянган төгрөг олгоход 703 тэрбум төгрөг зарцуулахаар төсөвлөсөн нь алдагдлын хэмжээг ДНБ-ий 52 хувьд хүрэхэд нөлөөллөө. Иргэд хоорондоо нэгдэж жижиг, дунд үйлдвэрлэл эрхлэх мөнгөө нэг дор бөөнөөр нь авах эрхийг хуулиар нээж өгсөн" гэв. Харин АН-ын ажлын хэсгийг ахалж ажилласан Д.Ганхуяг гишүүн "УИХ эрсдэлтэй төсөв баталсан. Төр, хувийн хэвшил, иргэний нийгэм хамтраад эдийн засгийнхаа суурь бүтцийг эвдчихгүй давж гарах хэрэгтэй байна. Төсвийн алдагдал 9.9 хувьтай байна гэдэг харамсалтай үзүүлэлт. Монгол Улс төсвийн шинэчлэлээ даруй хийх шаардлагатай байна" гэж хэллээ. Д.Дондог гишүүн сум хөгжүүлэх санд 24, Монгол мал хөтөлбөрийг хэрэгжүүлэхэд 27 тэрбум төгрөг төсөвлөснийг хэллээ. Хөрөнгө оруулалтаар дамжуулж ажлын байр бий болгох, жижиг дунд үйлдвэрлэлийг хөгжүүлэх зорилго тавьсныг ч онцоллоо. Бэлэн мөнгө тарааснаар үнийн хөөрөгдөл газар авах эрсдэл бий. Цахилгаан, дулаан гэсэн суурь үнэ хөдлөхгүй бол үнийн хөөрөгдөл аюул дагуулахгүй гэж найдаж байгаагаа Төсвийн байнгын хорооны дарга Ц.Даваасүрэн хэллээ.