УИХ-ын нэгдсэн чуулганы өнөөдрийн /2020.10.29/ ээлжит хуралдаан боллоо.  Монгол Улс, Олон улсын хөгжлийн ассоциаци хооронд байгуулах "Онцгой байдлын үеийн дэмжлэг болон хөдөлмөр эрхлэлтийн төсөл"-ийн Санхүүжилтийн хэлэлцээрийг соёрхон батлах тухай хуулийн төсөл /Засгийн газар 2020.10.08-ны өдөр өргөн мэдүүлсэн, соёрхон батлах/; хуулийн төслийг хэлэлцлээ.

УИХ-ын гишүүд хуулийн төсөлтэй холбогдуулан асуулт асуулаа. 

УИХ-ын гишүүн Б.Энх-Амгалан:

Монгол Улсын Онцгой байдал маш сайн ажилласны үр дүнд бид цар тахлыг алдаагүй дотооддоо сайн барьж чадсан. Халдвар авсан иргэдийгээ богино хугацаанд эмчилж, эрүүлжүүлж чадсан. Үүний үр дүнд Монголын жишээ гэж гаргаж чадах том ажлыг Засгийн газар хийж чадсан. Иргэдээ аварч чадсан. Иргэнээ Ковид-19 гэх цар тахлаас хамгаалж чадсан. 

Энэ цаг үед эдийн засгаа сулруулахгүй байх, ард иргэдийнхээ амьжиргааг бууруулахгүй байх, ажлын байрыг хорогдуулахгүй байх тал дээр онцгой анхаарч ажилласан. Ялангуяа хил гааль дээр тусгай горим журмын дагуу экспорт, импортын бүтээгдэхүүнийг чөлөөтэй нэвтрүүлэх асуудлыг маш сайн зохион байгуулсан. Энэ бүхний үр дүнд цар тахлыг гайгүй давж гарлаа. Одоо хоёр, гурав дахь давлагаа явж байна.

Одоо бид хөдөлмөр эрхлэлтийг дэмжиж, эдийн засгаа өсөн нэмэгдэх тал дээр анхаарах ёстой. Ийм учраас олон улсын зээл төслийн зүйл орж ирж байна. Олон улсын хөгжлийн ассоциац, онцгой байдлын үеийн дэмжлэг болох хөдөлмөр эрхлэлтийг дэмжих төслийг дэмжиж байна.