АНУ-ын Ерөнхий прокурор Эрик Холдер Америк улс хилийн чанадад байгаа иргэнээ үндэсний аюулгүй байдалд нь заналхийлж буйг мэдвэл шууд устгах эрхтэй гэдгийг түүхэндээ анх удаа мэдэгдлээ.

Ийнхүү тэрбээр хүний эрхийг хамгаалагчдын гомдолд хариу өгсөн байна. Хүний эрхийг хамгаалагчид өнгөрсөн жилийн есдүгээр сард «Аль-Кайда»-гийн идэвхтэй гишүүн, АНУ-ын иргэн Анвар аль-Авлакийг устгасан нь хууль бус үйлдэл хэмээн мэдэгдсэн билээ.

Ерөнхий прокурор «Америк улс дайны байдалд байгаа учраас ийм үед шүүхийн арга хэмжээ хэрэггүй» хэмээжээ.
Гэхдээ АНУ-ын иргэн « Аль-Кайда» болон бусад байгууллагын толгойлогчдын нэг байсан нөхцөлд л хүч хэрэглэнэ гэдгийг Холдер Чикагогийн хуулийн сургуулийнханд хэлсэн үгэндээ тэмдэглэсэн байна. Тэрбээр «Аливаа хүн эх орныхоо эсрэг зэвсэг барин боссон, эсвэл АНУ-ын иргэдийг устгах зорилгоор «Аль-Кайда»-тай үгсэн хуйвалдсан нөхцөлд нэг л хариу барина. Бид тэднийг зогсоохын тулд Үндсэн хуулиндаа нийцсэн бүхий л арга хэмжээг авах болно. Үхлййя аюултай төлөвлөгөөг зохион байгуулж буй хүнд үед бидэнд хүлээх цаг байхгүй. Бид ч хүлээхгүй» хэмээн мэдэгджээ.

АНУ-д төрсөн Анвар аль-Авлакийг «Аль-Кайда»-гийн нэг үүрийг толгойлдог гэх шалтгаанаар Йеменд устгасан юм. АНУ иргэнээ ийнхүү хөнөөснийг либераль улстөрчид, түүнчлэн Техас мужийн конгрессын гишүүн, Бүгд найрамдах намаас Ерөнхийлөгчид нэр дэвшихээр өрсөлдөж буй Рон Пол нар илт шүүмжилсэн. Рон Полын баталснаар АНУ-ын Хууль зүйн яам Анвар Аль-Авлакийг америкчуудаа устгахаар төлөвлөж байсан гэх ямар ч нотолгоо олоогүй аж.