С.Зоригийг хөнөөсөн хэрэгт шүүхээс 20 жилийн ял сонссон Т.Чимгээг эрүүдэн шүүсэн бичлэгийн хэсгээс Хууль зүй дотоод хэргийн сайд Х.Нямбаатар өчигдөр олон нийтэд дэлгэлээ.

Бичлэгийг олон нийтэд үзүүлэхийн өмнө сайд Х.Нямбаатар “Өнөөдөр Засгийн газрын хуралдаанаар зарим зүйлийг нууцаас хасах тогтоол гарсан. Та бүшхэн сайн санж байгаа бол 2019 лоны 3-р сарын 26-ны өдөр Засгийн газрын 115 дугаар тогтоол гарч хэргийн зарим бичлэгүүдийг ил болгож, олон нийтэд тараасан.

Энэ бол эрүүдэн шүүлттэй холбоотой асуудал. Улмаар энэ бичлэг ил болсны даар Чимгээ, Содномдаржаа, Булган нарыг эрүүдэн шүүсэн байж болзошгүй гэдэг үндэслэлээр эрүүгийн хэрэг үүсгэгдэн тухайн үеийн ТЕГ-ын дарга асан Хурц, прокурорын орлогч Эрдэнэбат, тагнуулын ажилтан Махгал, Баяр, Отгонбаяр, Бямбажав, Өлзийбаяр, Бархасбадь, Эрдэнэбат нарын 9 хүнд холбогдох хэрэгт мөрдөн шалгаж ажиллагаа явуулж прокурорт яллах дүгнэлт үйлдүүлээд Төв аймгийн шүүхэд шилжүүлсэн.

Шүүх хурал 2019 оны 8 дугаар сарын 12-19-ний өдрүүдэд шүүх хурал болж хэргийг прокурорт буцаасан. Ингээд үүнээс хойш ямар процеес явагдсаныг та бүхэн мэдэж байгаа” гэсэн юм.

Уг бичлэг нь 2013 онд гүйцэтгэх ажиллагааны явцад хийгджээ. Тодруулбал, 2013 онд Х.Амгаланбаатар шоронгоос С.Зоригийн хэргийг Эрдэнэтэд байгаа Б.Содномдаржаа, Т.Чимгээ нартай хамтран үйлдсэн” гэж мэдүүлснээр энэ гүйцэтгэх ажиллагаа эхэлсэн гэж байна. Энэ үеэс тагнуул, хуулийн байгууллагаас Т.Чимгээг мөрдөж эхэлсэн бөгөөд үүнтэй зэрэгцэн Х.Амгаланбаатар шоронгоос Т.Чимгээ рүү дарамталсан мессэж илгээж эхэлжээ. Энэ үеэр Т.Чимгээтэй нэгэн залуу утсаар танимхайран мессэж бичсээр итгэлийг нь олсон гэж мэдүүлжээ. Өөрөөр хэлбэл, үл таних залуу өөрийгөө хуульч, хууль зүйн зөвлөгөө өгөн хэмээн итгүүлж, Т.Чимгээ Х.Амгаланбаатарыг шоронгоос дарамтлаад байгаа тухай хэлсэн гэнэ. Энэ асуудлыг нь хуульч хэмээн танилцуулсан залуу шийдвэрлэж өгөхөөр хууль шүүхийн байгууллагаар явж итгэлийг нь олжээ.

Ингээд тэд 2013 онд Тэрэлж зочид буудалд уулзжээ. Энэ үеэр Т.Чимгээ 50 гр архи уусан, түүнээс хойш юу ч мэдээгүй, ухаан алдсан. Энэ үеэр өөрийнх нь гарын хээ зэрэг материалыг баримтжуулж авсан гэж шүүхэд мэдүүлсэн байдаг аж.

Үүнийг батлах бичлэгийг ийнхүү үзүүлэв. Бичлэгт Т.Чимгээ зочид буудалд нэгэн залуутай байх бөгөөд тун удалгүй Т.Чимгээг нүцгэлсэн, 2 залуу нэмж орж ирсэн харагдаж байна. Т.Чимгээг чармай нүцгэлэн орон дээр хэвтүүлж, хоёр залуу гарынх нь хээг авч, нэг залуу зураг авч байгаагаар бичлэгт үлджээ.

Хууль зүй дотоод хэргийн сайд Х.Нямбаатар бичлэгийн талаар “Энэ бол Т.Чимгээгийн зөвшөөрөлтэй үзүүлж буй бичлэг. Эмэгтэй хүнийг эвгүй байдлаар зургийг нь авч байгааг та бүхэн харсан байх. Яг энэ зургийг нөхөрт нь явуулсан байдаг. Сүүлд нөхөрт нь энэ бичлэгийг шүүхээс үзүүлсэн юм билээ.

Ийм байдлаар хүний эрхийг ноцтой зөрчиж хилс хэрэгт тулгасан асуудлыг шийдвэрлэж өгөхийг Т.Чимгээ хүссэн. Мөн охиноо зүй бусаар алдсан хэргийг ч сэргээж шалгуулах хүсэлт гаргасан” гэлээ.

Т.Чимгээг эрүүдэн шүүсэн бичлэгийн хэсгээс задаллаа