УИХ-ын өчигдрийн нэгдсэн хуралдаанаар энэ оны төсвийн тодотголын хоёр дахь хэлэлцүүлгийг хийж эхэллээ.

Төсвийн байнгын хорооны хурлаас дэмжлэг авсан 2008 оны төсвийн алдагдлыг ДНБ-ний 0.5 хувь байхаар тооцох, 2009 онд жижиг, дунд үйлдвэрийг дэмжих сангаас хэрэгжүүлэх арга хэмжээний бэлтгэл ажилд 0.3 тэрбум, УИХ-ын гишүүдийн туслахын тоог нэмэхэд шаардагдах 550 сая төгрөг, Баянхонгор-Нарийн-тээлийн чиглэлийн 50 км хатуу хучилттай зам барихад 1.5 тэрбум төгрөг, Улаанбаатар-Лүнгийн чиглэлийн авто замаас хурдан морины бариа хүртэлх 2.3 км хатуу хучилттай авто замд 380 сая төгрөг, Мөрөн-Хатгалын 102 км хатуу хучилттай авто замд 450 сая төгрөг тусгах зэрэг санал тус тус дэмжигдлээ.

Мөн төсвийн байнгын хорооноос дэмжлэг аваагүй саналаар санал хураалт явууллаа.

Улаанбаатар хотын нийтийн тээврийн автобус худалдан авахад арван тэрбум төгрөгийг төсөвт тусгах гэсэн санал дэмжлэг авсангүй. 2007 оноос барьж байгаа эрчим хүчний 26 объектын шугамын уртын зөрүү үнэ 3.7 тэрбум, Нарийн сухайт Ноён Сэврэй сумын цахилгаан дамжуулах шугамын санхүүжилтэд шаардагдах 1.7 тэрбум төгрөгийг төсөвт нэмэх гэх мэт байнгын хороон дээр дэмжлэг аваагүй саналыг гишүүд дэмжсэнгүй.

Төсвийн тодотголыг хэлэлцэж эхлэлээ