Британийн парламентын гишүүн ноён Жон Баттл тэргүүтэй төлөөлөгчидыг УИХ-ын дарга Д.Дэмбэрэл хүлээн авч уулзлаа.

Британийн Төлөөллийн танхамд суудалтай олон намыг төлөөлсөн бүрэлдэхүүн анх удаа Монголд айлчилж байгаа юм байна.

УИХ-ын дарга хоёр орны харилцаа, хамтын ажиллагаа улам өргөжин хөгжиж байгаа энэ үед Их Британийн парламентын төлөөлөгчид манай оронд айлчилж байгаад талархалтай байгаагаа илэрхийлээд, энэхүү айлчлал хоёр талын цаашдын хамтын ажиллагаанд ихээхэн ач холбогдолтой болно гэж үзэж буйгаа онцлон тэмдэглэв. Ноён Жон Баттл УИХ-ын даргыг хүндэтгэл үзүүлэн хүлээн авч уулзаж байгаад талархалтай байгаагаа илэрхийлээд, Британийн парламентын Нийтийн танхим болон Лордын танхимын дарга нарын мэндчилгээг уламжав.

Мөн цаашид хамтран ажиллах эхний сууриа тавьсан айлчлал болж байна гэлээ. Мөн айлчлалын хүрээнд албан ажлын уулзалт, яриа хийхээс гадна хөдөө орон нутагт ажиллаж, жирийн иргэдтэй уулзан тэдэнтэй санал бодлоо солилцсондоо баяртай байгаагаа тэмдэглэв гэж УИХ-ын Хэвлэл, мэдээллийн алба мэдээллээ.