Дэлхийн зах зээл дээр нефть бүтээгдэхүүний үнэ 3 дахин буурсан байхад манайд ердөө хэдхэн хувиар тодруулбал 26%-аар буурсан нь хачирхалтай.

Нефть импортлогч компанууд яг нэг өдөр шатахууны үнийг зэрэг нэмдэг нь энэ хачирхалтай байдлын шалтгааныг нь тодорхой олгож байгаа юм. Мөн манайд шударга бус өрсөлдөөнийг зохицуулах эрхзүйн зохицуулалт дэндүү хангалтгүй байгааг ч энд харуулж байна. Одоо мөрдөж байгаа хуулиар бол монополь эрхээ ашиглан зах зээлийн үнийг нэмсэн бол 250 мянгахан төгрөгөөр торгодог  юм байна.

Гэтэл нефть импортлогчид 1 литр тутмаас 300-500 төгрөг дунджаар цэвэр ашиг болгон унагаж байсан нь тогтоогдожээ.

Үүнтэй холбогдуулан Өчигдөр Төсвийн байнгын хорооны гишүүд шатахууны үнийн талаар холбогдох хүмүүсийг "асуулаа".
АМГТЭХГ-ын дарга Амарсайхан, Шударга бус өрсөлдөөн, хэрэглэгчийн эрхийг хамгаалах газрын /ШБӨХЭХГ/ дарга Д.Мандах, Эрдэс баялаг, эрчим хүчний дэд сайд Б.Ариунсан болон импортлогч компаниудын төлөөлөл гишүүдийн асуултад хариулт өгөв.

Эрдэс баялаг, эрчим хүчний дэд сайд Б.Ариунсан үнэ нэмэгдсэн шалтгааныг долларын ханший хэлбэлзэлтэй холбон тайлбарласан бол шатахуун импортлогч компаниудын төлөөлөл өмнө нь өндөр үнээр авсан шатахууны нөөц дуусаагүй байгаа учраас үнэ буурахгүй байгаа гэлээ.

Харин ШБӨХЭХГ-ын дарга Д.Мандах: "Бид монополь аж ахуйн нэгжүүдийг хянадаг. Одоогийн байдлаар нефть бүтээгдэхүүний дотоодын зах зээлд НИК, "Петровис" компани давуу байдалтай байна. Тиймээс байнга шалгаж, хянадаг. Хамгийн сүүлд 2008 оны есдүгээр сард шалгалт хийхэд импортлогч зургаан компани үгсэн хуйвалдаж, нэг өдрийн дотор шатахууны үнээ зэрэг нэмснийг тогтоосон. Хуулийн дагуу 250 мянган төгрөгөөр торгох арга хэмжээ авсан"  гэв.

Байнгын хорооны гишүүд эдгээр албаны хүмүүсийн тайлбарыг сонсоод ихэд л бухимдацгаалаа.

Б.Чойжилсүрэн гишүүн ЭБЭХЯ-наас гишүүдэд тараасан танилцуулгад үнэ буурахгүй байгаа шалтгааныг худал бичсэн байна гэлээ.

Л.Гантөмөр: 250 мянган төгрөгөөр торгохын оронд тусгай зөвшөөрлийг нь хурааж болдоггүй юм уу. Хуульд өөрчлөлт оруулах төсөл яагаад гацсаныг судалсан уу?
Д.Мандах: Бид хуулийн хүрээнд зөвхөн монополь эрхэз ашиглаж буй эсэхэд хяналт тавих үүрэгтэй. Үнээ буулга гэж хэлэх боломжгүй л дээ. Хуульд өөрчлөлт оруулах төсөл өргөн барьсан. Үүнийхээ араас сурагласан ч өрсөлдөөнтэй холбоотой асуудлыг шийдэх дургүй байдаг бололтой. Тиймээс хариуцлагыг өндөрсгөх тухай бас нэг төсөл боловсруулаад Шадар сайдад өгсөн байгаа.

Ш.Сайхансамбуу гишүүн одоо бүх хүн харж байгаа дээр үнэ цаашид бууруулж чадах бол чадна, чадахгүй бол чадагүй гэдгээ шууд хэл хэмээн Нефть импортлогч компаниудын төлөөлөлд тулгахад тэд Шатахууны үнэ одоогийнх хэвээр, валютын ханш тогтвортой бол тодорхой хэмжээгээр буулгах боломжтой. Цагаан сар хүртэл шатахууны үнийг нэмэхгүй" хэмээн амлав.