Өчигдрийн төрийн ордонд төрийн түшээдийн гэргий нарын хөлд дарагдсан өдөр байлаа.

Эмэгтэйчүүдийн эрхийн өдрийг угтаж УИХ-ын Нийгмийн бодлого, боловсрол, соёл, шинжлэх ухааны байнгын хороо, "Эмэгтэй удирдагч" сантай хамтран УИХ-ын гишүүдийн гэргий нарыг урьж "Төрийн түшиг эмэгтэйчүүд" уулзалт ярилцлагыг зохион байгуулжээ. Ингэж төрийн түшээдийн гэргийд цугларч байгаа нь монголын түүхэнд анх удаа болж байгаагаараа онцлогтой юм.

Төрийн түшээдийн арын албыг бүрэн хариуцдаг гэргий нарыг УИХ-ын дарга Д.Дэмбэрэл, МАХН-ын бүлгийн дарга Д.Лүндээжанцан нар угтан авч, Олон улсын эмэгтэйчүүдийн эрхийг хамгаалах өдрийн баярын мэнд дэвшүүлж, мөн цэцэг, дурсгалын зүйл өглөө. Дараагаар нь Д.Дэмбэрэл дарга гишүүдийн гэргий нарыг "Та бүхэн эр нөхрийнхөө хамгийн сайн туслах, орлогч захирал, анхны номынх нь редактор, имижмекер нь болдог билээ" хэмээн магтан өөрийн болон бусад гишүүдийн гэргий нарт УИХ-ын чуулганы нэгдсэн хуралдааны танхим, Төрийн ёслол хүндэтгэлийн өргөө зэргийг танилцуулж, тэднийг төрийн ордонтой буюу эр нөхрийнхөө ажлын байртай албан ёсоор танилцуулах албыг гүйцэтгэлээ.

Уулзалтад 50 орчим түшээдийн гэргий хүрэлцэн иржээ. Үүнд дотор Монгол улсын анхны тэргүүн хадагтай Ш.Цэвэлмаа хүрэлцэн ирж, гэргий нарт өөрийн үнэтэй зөвлөгөөг өгч байсан бол, хэвлэл мэдээллийнхэн анхаарлыг хамгийн ихээр Д.Батбаяр гишүүний гэргий дуучин Т.Баясгалан татаж байлаа.

Төрийн түшээдийн гэргий нар цай, кофе уунгаа хоорондоо танилцаж ярилцаж. Уулзалтын эцэст УИХ-ын гишүүдийн гэргий нар клуб байгууллаа. Тэргүүнээр нь Х.Бадамсүрэн гишүүний эхнэр н.Рэнцэн-Амгалан, дэд тэргүүнээр Э.Бат-Үүл гишүүний" эхнэр Б.Дэлгэртуяа ажиллахаар болсон байна.

Төрийн түшээдийн гэргийд төрийн ордонтой танилцлаа