УИХ-ын дарга Д.Дэмбэрэл, Ерөнхий сайд С.Баяр нар Олон улсын эмэгтэйчүүдийн эрхийн өдрийг тохиолдуулан төр, засгийн байгууллагад өндөр хариуцлагатай алба хашиж байгаа төрийн түшээ эмэгтэйчүүдээ өчигдөр Төрийн ёслол, хүндэтгэлийн өргөөнд хүлээн авч уулзаж, баярын мэндчилгээ дэвшүүлэв.

УИХ-ын дарга Д.Дэмбэрэл энэ үеэр хэлсэн үгэндээ, улс орныхоо нийгмийн хөгжил, дэвшлийн төлөө эмэгтэйчүүд, эхчүүдийнхээ хийж гүйцэтгэсэн ажил үйлс, оруулсан хувь нэмрийг Монголын төр, засаг өндрөөр үнэлж байдаг юм.
Нийт хүн амын талаас илүү хувийг эзэлдэг эмэгтэйчүүд маань боловсрол, эрүүл мэнд зэрэг нийгмийн үйлчилгээний гол салбарын ачааг үүрэлцэж, төрийн үйлчилгээг олон түмэнд хүргэхэд ихээхэн хүчин зүтгэл гаргаж байна. Тийм ч учраас эхчүүд, эмэгтэйчүүдээ байнга анхаарлынхаа төвд байлгаж, эрх зүйн болон бодлогын шинэчлэлийн хүрээнд эмэгтэйчүүдийн асуудлыг онцгойлон авч үзэж байгаа. Төр, засгийн байгууллагад хариуцлагатай алба хашиж буй та бүхэн ч энэ асуудалд оролцож, шийдвэр гаргалцдаг хүмүүс гэдгийг онцлон дурдаад төрийн түшээ бүсгүйчүүдээрээ уламжлан Монголын нийт эхчүүд эмэгтэйчүүддээ Баярын мэндчилгээ дэвшүүллээ.  УИХ-ын дарга, Ерөнхий сайд нар төрийн түшээ бүсгүйчүүддээ амьд цэцгийн баглаа, дурсгалын зүйл гардуулж, хамтдаа дурсгалын зураг авахуулжээ.